Hơdôm hrơi rơgao, rim wot hmâo tal pơphun mơ-ĭt prăk pơkrem gum tơngan hrŏm yua kơ mơnuih ƀun rin lĕ yă Nguyễn Thị Xuân An, ƀơi phường mrô 3, plơi prong Đà Lạt, tơring čar Lâm Đồng leng kơ anăp nao hăng gum hrŏm. Hăng ñu, khă mrô prăk pô mơ-ĭt ƀu lu, samơ̆ yôm phăn biă, gum tơngan hrŏm plơi pla, mơnuih mơnam anăp nao mơnuih ƀun rin, mơnuih tơnap tap, djru gơñu hmâo dong prăk čan pioh pơđĭ kyar bơwih ƀong sang anô̆. Yă Nguyễn Thị Xuân An, lăi:

“Drơi pô kâo rim thun leng kơ gum hrŏm. Bơhmu hăng thun hlâo mơ-ĭt lĕ thun anai gir run mơ-ĭt lu hloh, dơnong tui anun. Thun anai kâo mơ-ĭt prăk pơkrem hmâo 20 klăk prăk, pơmin hlâo lơ 14/3 glăi nao pơ̆ phường mơ-ĭt dong”.

Anai lĕ thun tal 4 Sang prăk gah hơdră bruă mơnuih mơnam tơring čar Lâm Đồng gum hrŏm hăng Jơnum min djop djuai ania mơnuih mơnam Việt Nam hăng hơdôm khul grŭp mơ̆ng tơring čar pơphun mơ-ĭt prăk pơkrem gum tơngan hrŏm yua kơ mơnuih ƀun rin. Kiăo tui anun, mrô mơnuih anăp nao, gum hrŏm mơ-ĭt prăk pơkrem mơ̆ng jơlan hơdră jai hrơi jai lu, mrô prăk hmâo čơkă mă ăt jai hrơi jai lu mơn. Mơ̆ng 24 klai prăk hmâo mă tơdơi tal pơphun blung a, truh tal 3 lĕ mrô prăk đĭ hmâo 130 klai prăk mơ-ĭt prăk pơkrem gum tơngan hrŏm yua kơ mơnuih ƀun rin.

Tui ơi Nguyễn Hữu Quang, Kơ-iăng Khua Sang prăk gah hơdră bruă mơnuih mơnam tơring čar Lâm Đồng, jơlan hơdră mơ-ĭt prăk pơkrem gum tơngan hrŏm yua kơ mơnuih ƀun rin hmâo laih tơlơi lar hyu prong amăng hơdôm gưl mơnuih ƀôn sang amăng tơring čar. Tal 4 anai, jơlan hơdră mơ-ĭt prăk pơkrem gum tơngan hrŏm yua kơ mơnuih ƀun rin amra sui sa blan, čang rơmang ngă pơhưč dong lu mơnuih gum hrŏm, anăp nao.

 “Thun anai, mơ-ĭt prăk pơkrem gum tơngan hrŏm yua kơ mơnuih ƀun rin sui truh sa blan. Ƀing gơmơi ăt čang rơmang mơn bruă pơjing mrô prăk sui hrơi hloh amra pioh mơnuih ƀôn sang gum hrŏm djop, tum, lu hloh. Ƀing gơmơi rơngiao kơ bruă pơphun mơtăm ƀơi anih anom mă bruă lĕ, hơdôm hrơi mă bruă mơ̆ng hơdôm anih pơsit hră pơ-ar hơđong ƀơi hơdôm bôh să, phường, tơring kual amra pơphun pơsur dong pioh mơnuih ƀôn sang, anom bơwih ƀong ƀơi anai mơtăm gum hrŏm pơčruh mut amăng jơlan hơdră”.

 Truh mông anai, tơdơi rơbêh kơ 1 rơwang hrơi tơjuh pok phun, jơlan hơdră mơ-ĭt prăk pơkrem gum tơngan hrŏm yua kơ mơnuih ƀun rin ƀơi Lâm Đồng hmâo ngă pơhưč rơbêh kơ 1.400 čô mơnuih ping gah, mơnuih apăn bruă, mơnuih mă bruă čar, mơnuih amăng khul, grŭp, mơnuih mă bruă kơ sang bruă hăng mơnuih ƀôn sang gum hrŏm pok giăm truh 1.600 pok hră pơkrem prăk, hăng mrô prăk đĭ truh rơbêh kơ 67 klai prăk.

Ơi Võ Ngọc Hiệp – Ding kơna Grŭp apăn bruă Ping gah tơring čar, Kơ-iăng Khua Jơnum min mơnuih ƀôn sang tơring čar Lâm Đồng, Khua Grŭp pơ ala Khul wai lăng Sang prăk gah hơdră bruă mơnuih mơnam tơring čar Lâm Đồng, pơsit: “Bruă pơphun “Blan mơ-ĭt prăk pơkrem gum tơngan hrŏm yua kơ mơnuih ƀun rin” hmâo bôh yôm phăn biă, pioh pơjing ngăn rơnoh djơ̆ tui bruă mă jai hrơi jai klă hloh prăk kiăng yua mơ̆ng mơnuih ƀun rin hăng mơnuih gah hơdră bruă gum djru pơkon, djru ngă tui tơhnal pơkă hrŏ trun ƀun rin sui thun mơ̆ng tơring čar. Hrŏm hăng anun, mơ̆ng anun pơjing tơlơi pơplih tơlơi thâo hăng bruă ngă mơ̆ng hơdôm gưl, hơdôm gơnong bruă hăng mơnuih abih bang mơnuih mơnam amăng bruă pơjing prăk kơ bruă brơi čan gah hơdră bruă mơnuih mơnam; pơsur hơdôm bôh anom bơwih ƀong, ƀirô, anom bruă, mơnuih apăn bruă, mơnuih mă bruă čar, mơnuih mă bruă kơ sang bruă hăng hơdôm gưl mơnuih ƀôn sang amăng tơring čar Lâm Đồng pơdah bruă mă klă hiam, ngă tui pran jua gum djru nao rai tơdruă hăng mơnuih ƀun rin hăng hơdôm mơnuih ƀu hmâo anih gơnang hăng hơdră mơ-ĭt prăk pơkrem ƀơi Sang prăk gah hơdră bruă mơnuih mơnam “Bruă mă anet hmâo yua yôm prong" pioh pơjing dong ngăn rơnoh “Gum tơngan hrŏm yua kơ mơnuih ƀun rin hăng hơdôm mơnuih gah hơdră bruă pơkon”.

  Hrŏ trun ƀun rin kơjăp lĕ hơdră pơtrun prong mơ̆ng Ping gah, Kơnuk kơna hăng jing bruă mă mơ̆ng abih bang mơnuih ƀôn sang, hmâo tơhnal bruă mă klă hiam ană mơnuih dơlăm, jing tơlơi pơmin hluh gah, ha sa mơ̆ng Ping gah, Kơnuk kơna lơm pơdŏng bruă bơwih ƀong anih anom sĭ mơdrô pơsit jơlan gah mơnuih mơnam dưm kơnar. Prăk čan gah hơdră bruă yua Sang prăk gah Hơdră bruă mơnuih mơnam ngă tui lĕ sa amăng hơdôm bruă djru hrŏ trun ƀun rin yua kơ Ping gah, Kơnuk kơna ngă tui hăng ƀơi tơring čar Lâm Đồng bruă brơi čan prăk gah hơdră bruă hmâo ngă tui ba glăi bôh tơhnal prong biă, djru ngă tui jơlan hơdră hrŏ trun ƀun rin kơjăp sui thun, pơdŏng plơi pla phrâo, pơhlôm hơđong tơlơi hơdip mơda mơnuih mơnam ƀơi tơring čar.

Anăp nao bruă “Đơ đam dêh čar gum tơngan hrŏm yua kơ mơnuih ƀun rin - Ƀu pioh hlơi lui lơi gah tlôn” yua kơ Khua dêh čar pơphun, amăng 3 thun rơgao “mơ-ĭt prăk pơkrem gum tơngan hrŏm yua kơ mơnuih ƀun rin” dưi hmâo Sang prăk gah hơdră bruă mơnuih mơnam tơring čar Lâm Đồng gum hrŏm hăng 4 grŭp pơphun bruă kơđi čar mơnuih mơnam jao pơphun truh kih hăng tơlơi anăp nao mơ̆ng lu mơnuih amăng khul, amăng grŭp hăng mơnuih ƀôn sang amăng tơring čar djru klă amăng bruă pơjing ngăn rơnoh pơhrua nao kơ Sang prăk gah hơdră bruă mơnuih mơnam brơi čan kơ mơnuih ƀun rin hăng mơnuih gah hơdră bruă gum djru pơkon./.