Mơng akŏ thun truh ră anai, kông ang tơring čar Lâm Đồng đing nao pơphun hyu tir, wai lăng hơdôm ară jơlan phun, tañ ĕp ƀuh, pơsir hĭ rơbêh 2.700 wŏt bruă mơnuih mơgăt rơdêh mơñum tơpai ƀiêr. Tui Đại tá Lê Văn Xuyên, Khua anom bruă pơgang rơnuk rơnua, kông ang tơring čar Lâm Đồng, hăng tơlơi pơsit ƀu lui hlơi ôh, ƀu hơmâo kual kŏm, kông ang hơdôm anom bruă amăng tơring čar khut khăt pơsir hĭ bruă ngă soh. Ping gah tơring čar, Jơnum min mơnuih ƀôn sang tơring čar ăt hơmâo lu hră pơ-ar git gai, rơkâo pơsir khut khăt tui tơlơi pơkă amăng Ping gah hăng gong gai hăng ƀing apăn bruă Ping gah, mơnuih mă bruă mơng hơdôm anom bruă, gong gai amăng tơring čar.

Bruă pơsir khut khăt bruă ngă soh lơm mơñum tơpai ƀiêr samơ̆ ăt mơgăt rơdêh  amăng jơlan glông, blung hlâo pơtrut ngă tui tơlơi pơkă hăng tơlơi phiăn đuăi rơdêh amăng jơlan glông amăng mơnuih mơnam, hrŏ trun 15% rơdêh pơjrŏm amăng jơlan glông bơdjơ̆ nao mơñum tơpai ƀiêr ƀơi tơring čar Lâm Đồng.