Jơnum yua 6 boh phương hơmâo hơdôm boh phương Xuân Hương-Đà Lạt, Lâm Viên-Đà Lạt, Xuân Trường-Đà Lạt, Cam Ly-Đà Lạt, Lang Biang-Đà Lạt hăng să Lạc Dương gum hrŏm pơphun, kiăng lăi pơthâo tơlơi dưi, akŏ bruă hăng hmư̆ tơlơi rơkâo mơng anom bruă bơwih ƀong sĭ mơdrô, anom bruă tuh pơ alin.

Hăng abih tih đơ đam rơbêh 1.500 km karê, mrô mơnuih rơbêh 314.000 čô, dŏ dong amăng kual đang glai Đà Lạt-Lạc Dương, 6 boh phương hơmâo ayuh hyiăng bơkơnar, glông giăm 1.500 met, gêh gal amăng pơđĭ kyar tuai čuă ngui pơdơi pran, ngă hmua yua boh thâo phrâo, plơi prong mơtah hăng bơwih bơwang klă hloh.

Lu akŏ bruă glăk jak iâu tuh pơ alin amăng hơdôm bruă plơi pla, sĭ mơdrô, tuai čuă ngui, anih anom. Samơ̆, anom bơwih ƀong sĭ mơdrô brơi thâo, sa, dua tơlơi gun sui thun kiăng tañ pơsir hĭ. Ơi Lê Văn Cường, Khua kông ti TNHH Đà Lạt GAP lăi nao tơlơi gun sit nik kơ lŏn mơnai: “Ƀing gơmơi glăk gun kơ bruă lŏn mơnai samơ̆ kual lŏn anun lĕ lŏn gah rơngiao đang glai, aka ƀu hơmâo hră pơ-ar. Yua anun lơm ƀing gơmơi ngă mrô kual ăt tơnap mơn, hăng lơm ƀing gơmơi kiăng čan prăk, sang bruă prăk rơkâo kiăng hơmâo kông ngăn pơhlôm brơi, hơmâo hră lŏn pô kah mơng brơi čan”.

Kual 5 boh phương Đà Lạt hăng să Lạc Dương arăng lăng dŏ lu tơlơi gal, anih pơđĭ kyar prong samơ̆ tơlơi dưi aka ƀu tŭ mă lăp djơ̆. Mơng hơdôm tơlơi gun anom bơwih ƀong lăi pơthâo, kơ-iăng khua jơnum min mơnuih ƀôn sang tơring čar Lâm Đồng Nguyễn Hồng Hải rơkâo djop ƀon lan hăng gơnong bruă, anom bruă prap lui tong ten hlâo ba akŏ bruă jak iâu tuh pơ alin, pel ĕp dưm dăp, tơhnal pơkă, lŏn mơnai, pơgiong hră pơ-ar hăng hơdôm tơlơi gal pok pơhai, bĕ hĭ bruă hơmâo anom bruă tuh pơ alin laih kah mơng pơsir hĭ tơlơi gun. “Kâo rơkâo khua mua 5 boh phương hăng să Lạc Dương kah hăng khua mua hơdôm gơnong bruă, sang bruă kiăng pel ĕp tơhnal pơkă dưm dăp plơi prong. Tơlơi amăng lăm, ñu amra lăp djơ̆ hăng tơlơi rơkâo mơng anom bruă tuh pơ alin hă ƀŭ ? Gir run ngă brơi kjăp kiăng bĕ hĭ bruă lơm hơmâo anom bruă tuh pơ alin laih, anom bruă tuh pơ alin ngă bruă laih kah mơng pơphun pơsir hĭ tơlơi tơnap tap, tơlơi gun brơi akŏ bruă.”

Tơdơi kơ mông jơnum, khua mua tơring čar Lâm Đồng rơkâo djop ƀon lan pơtum pơƀut, pơčlah rĭm tơlơi rơkâo mơng anom bơwih ƀong, pơsit tong tơlơi glăm ba pơsir hĭ hăng kiăo tui lăng lơm hơmâo boh than ba glăi. Tơring čar Lâm Đồng ƀuăn tŏ tui gum hrŏm, pơsir hĭ tơnap tap tui tơlơi pơkă amăng tơlơi phiăn, ngă gêh gal kiăng hơdôm akŏ bruă dưi pok pơhai sit nik, tŭ yua./.