Tui hăng anun, tơring čar pơtrun hiăp djop plơi pla, anom bruă, sang bruă tuh pơ alin ngă giong bruă čih pioh, dăp bruă, jŭ yap pơsit tong ten hăng pơkă hnơ̆ng či man pơdong plơi prong, kual plơi pla; djop să khom ngă giong bruă pơkă hnơ̆ng hrŏm gưl să lĕ amăng klâo blan tal II thun anai.

Khul wai lăng djop kơčăo bruă tuh pơ alin mrô 1, dưi tŭ mă tơlơi jao pơkă hnơ̆ng hrŏm abih bang man pơdong plơi prong hăng 5 boh phường sô̆ nao rai kah hăng Xuân Hương-Đà Lạt, Lâm Viên-Đà Lạt, Xuân Trường-Đà Lạt, Cam Ly-Đà Lạt hăng Lang Biang-Đà Lạt, ngă giong amăng blan 8 pơ anăp. Laih dơ̆ng pok pơhai pơkă hnơ̆ng hrŏm plơi prong hăng 4 boh phường sô̆ nao rai kual Bảo Lộc tơdơi kơ hơmâo tơlơi pơgôp hiăp mơ̆ng khul apăn bruă phun ping gah tơring čar. Khul wai lăng djop kơčăo bruă tuh pơ alin man pơdong mrô 2 ngă bruă pơkă hnơ̆ng hrŏm kơ plơi prong hăng 6 boh phường sô̆ nao rai ƀơi Phan Thiết hăng 2 boh phường sô̆ nao rai Phước Hội-La Gi, khom ngă giong amăng blan 6 anai. Hăng anih tuai čuă ngui gưl dêh čar ƀơi ia dơnao Tuyền Lâm, brơi pơkă hnơ̆ng tañ hloh, pơkă hnơ̆ng lăng nao pơ anăp adih truh thun 2050, tơdơi kơ bruă pơkă hnơ̆ng dưi pơsit hĭ.