Tơlơi anai khom hmâo ƀirô apăn bruă, mơnuih mơnam hăng sang anô̆ đing nao hloh dong amăng bruă pơgang hăng bơwih brơi kơ čơđai muai, biă ñu amăng bơyan anai. Mơng akô̆ thun truh ră anai, ƀơi tơring čar Gia Lai hmâo 7 mơta tơlơi ia ƀlung ngă 10 čô čơđai djai. Amăng anun tơlơi truh ia ƀlung truh lu ƀơi hơdôm bôh tơring glông kah hăng Krông Pa, Đăk Đoa, Kbang.

Mơnuih hmâo tơlơi truh lĕ ƀing čơđai anet glăk thun nao hrăm hră, juăt nao pơ̆ đang hmua, ia krông, čroh hnoh, hyu kiăo rơmô, djru amĭ ama. Ơi Phạm Trần Anh, Kơ-iăng Khua Gơnong bruă wai lăng mơnuih mă bruă, tơhan rơka ruă hăng mơnuih mơnam tơring čar Gia Lai lăi lĕ, hrŏm hăng bruă pơđĭ tui tơlơi pơmin, hăng pơtô čơđai bôh thâo kơ pô kiăng pơhlôm lơm glăk amăng ia, rim sang anô̆ khom wai lăng bruă rô hyu ngui ngor mơ̆ng ană bă biă ñu amăng bơyan pơdơi prong./.