Rôk tui jơlan đuăi hmar, hơdôm mơnuih mă bruă hăng ƀing kỹ sư glăk mă bruă ƀu pơdơi: mơ̆ng tuh ƀê tông, pơdŏng tơdrông toa jơlan truh pơkra giong rim črăn bruă anet. Jua măi mok tơtar đĭ dik dăk. Hơdôm bôh rơdêh pơgiăng tô nao rai pơgiăng gơnam tam man pơkra. Ayong Lê Văn Huynh, mơnuih glăk mă bruă ƀơi akô̆ tô jơlan TL 10 lăi pơthâo:

“Adơi ayong mă bruă gir run abih pran jua. Ăt hur har mă bruă mơn, khă Tết samơ̆ adơi ayong hur har pran jua mơn. Hăng pran jua abih bang adơi ayong leng kơ hrưn đĭ gir run mă bruă abih pran jua pô, hăng tơhnal pơkă pioh pơhlôm rơnoh bruă".

Hrŏm hăng pran jua anun, ayong Phan Viết Trí, Khua Grŭp man pơkra akô̆ tô jơlan TL 10 brơi thâo, grŭp ñu hmâo 30 čô mơnuih, hrơi Tết Prang, abih bang grŭp ăt mă bruă kah hăng tơđar mơn.

“Ră anai adơi ayong glăk gir run abih rơnoh pioh hơneč mă ngă brơi ring bruă ngă tui djơ̆ rơnoh. Khă ayuh hyiăng ƀu gal samơ̆ adơi ayong ăt hơneč mă mơn pioh mă bruă, adai hơjan ăt mă bruă mơn. Tết Prang adơi ayong ăt mă bruă kah hăng tơđar mơn”.

Jơlan luh Phượng Hoàng lĕ jơlan luh dŏng ƀơi jơlan đuăi hmar Khánh Hòa – Buôn Ma Thuột. Ră anai mơnuih gơgrong yua prăk pơkra glăk pơpha lu mơnuih mă bruă, rơdêh, măi mok mă yua “3 ka – 4 kíp” hrơi mlăm pioh pơkra giong jơlan luh amăng rơnuč thun 2025. Ƀơi ring bruă dua jơlan luh mur ƀơi anih čun čue Phượng Hoàng gah tơring čar Dak Lak, hơdôm pluh čô mơnuih mă bruă hrŏm hăng hơdôm bôh rơdêh, măi mok glăk pơđuh bôh min ƀoh amăng luh, kuăi dŭ pơgiăng lŏn bôh pơtâo tơbiă gah rơngiao, bư̆ war, glia ƀê tông hăng hlă hriăng ngă kơjăp vông amăng luh. Ơi Cao Tấn Lực – Kơ-iăng Khua git gai bruă pơkra jơlan luh Phượng Hoàng, brơi thâo:

“Sang bruă ba tơbiă jơlan gah mă bruă “3 ka – 4 kíp” djă pioh hrơi mlăm pioh pơpha brơi bruă mă khoer amăng luh. Rơnoh bruă klơi mơ̆ng ƀing gơmơi ƀơi jơlan luh pơ̆ Yŭ gah hnuă mơ̆ng tơring čar Dak Lak hmâo klơi laih 400 met, gah iao hmâo rơbêh kơ 440 met”.

Ơi Ngô Hiểu Khoa, Khua Grŭp git gai Grŭp Đèo Cả brơi thâo, jơlan luh Phượng Hoàng ataih 1,7 km lĕ, sa amăng hơdôm bruă pơkra abih bang 11 km yua kơ anom gơgrong man pơkra. Ră anai rim hrơi grŭp pơpha giăm truh 400 čô mơnuih mă bruă hăng năng ai ñu 100 mơta rơdêh măi mok mă yua ha amăng plĕ pok pơhai pơkra jơlan luh hrŏm hăng 10 bôh tơdrông toa hăng jơlan gah pô gơgrong pơkra. Tơdah bruă pơsir anih anom pơkra jơlan gah tơring čar Khánh Hòa dưi pơsir lăp djơ̆, kơčăo bruă jơlan luh amăng rơnuč thun 2025 amra dưi ngă. Ơi Ngô Hiểu Khoa, lăi.

“Thun 2025, ƀing gơmơi hrưn đĭ pơkra giong hơdôm phun jơlan, glông jơlan, tơdrông yông, phun tơdrông toa. Kơnong kơ jơlan luh Phượng Hoàng glăk bưp ƀiă tơnap amăng bruă pơsir anih yua pioh pơkra jơlan luh gah Ngŏ tơring čar Khánh Hòa, hăng tơdah pơhlôm pok bah amăng luh jơlan hlâo kơ Tết tui phiăn juăt 2025 anai hăng tơlơi lŏn drŏn djơ̆ hrŏm ƀơi anai thơ sit ñu rơnuč thun 2025 ƀing gơmơi amra pơhlôm rơnboh bruă mă pơkra jơlan luh Phượng Hoàng”. 

Rơwang bruă jơlan đuăi hmar Khánh Hòa – Buôn Ma Thuột hmâo abih bang rơwang ataih 116,5 km, amăng anun, lu ñu rơwang bruă găn tơring čar Dak Lak. Biă ñu, rơwang bruă črăn 3 hmâo ngă giong laih bruă pơsir anih anom man pơkra hăng hmâo dưm dăp man pơkra 32%. Khă tơnap tap gah ayuh hyiăng, hăng 18 hrơi hơjan amăng blan 12, samơ̆ kơnang kơ pran pơsit hăng pran jua yak rơgao tơnap mơ̆ng mơnuih mă bruă, rơnoh bruă pơkra ăt dưi djă pioh mơn. Ơi Đặng Thọ Dần, Khua git gai rơwang bruă, brơi thâo:

“Ră anai ƀơi anih prăk pơkra giăm truh 1 rơbâo čô mơnuih mă bruă glăk hur har pran bruă mă bruă, hơjan ăt mă bruă mơn, 500 mơta măi mok hăng 49 glông jơlan čuk phun ƀơi đơ đam jơlan. Ƀing gơmơi pơtă na nao hơdôm bôh anom khom pơhlôm tơlơi phiăn mă bruă, mơnuih mă bruă khom čơkă mă prăk blan, khom pơgang tơlơi dưi kơ mơnuih mă bruă”.

Hăng tơhnal pơkă amăng rơnuč thun 2025 ngă giong 68 km blung a mơ̆ng Rơwang bruă jơlan đuăi hmar Khánh Hòa – Buôn Ma Thuột, hơdôm bôh anom bơdjơ̆ nao hmâo hăng glăk hmâo ngă tui ha amăng plĕ hơdôm jơlan pơsir pioh pơtrut tañ rơnoh bruă, ngă ƀiă hrơi man pơkra ring bruă. Hơdôm hrơi akô̆ thun 2025, ha rơbâo čô mơnuih mă bruă ƀơi ring bruă. Gơñu jing hơdôm mơnuih pơtrut tañ rơnoh pơkra giong jơlan đuăi hmar, djru pioh Dap Kơdư lăi hrŏm, Dak Lak lăi ha jăn hmâo dong tơlơi gal hrưn đĭ amăng rơnuk phrâo hrưn đĭ pô./.