Rĭm wŏt truh hơdôm hrơi blan 8, tơlơi hơdor kơ sa bơyan yan hing ang pơƀuh glăi amăng pran jua rĭm čô mơnuih djru blah wang đưm hlâo. Hăng tơhan ayăt mă krư̆ Đinh Kim Anh, dŏ ƀơi phương Ea Kao, tơring čar Dak Lak, anŏ yôm kiăng hơmâo tơlơi rơngai, ngă pô ba glăi mơng thun blan djru blah ngă lơm dŏ hlăk ai hăng tơlơi tuh drah pơčah asar mơng ƀing gŏp. Thun 1972, tơdơi kơ djơ̆ boh mĭn amăng sa wŏt nao čơkă ƀing ngă hơkrŭ, ñu rơka kơtang hăng ayăt mă krư̆. Rơbêh 2 thun ba hyu krư̆ lu sang mơnă, ñu ayăt pơgô̆ kiăng pơhai samơ̆ ñu ƀu lăi hơget ôh, yua gah tlôn ñu lĕ hơdôm anih ngă hơkrŭ ƀu dưi lăi pơthâo brơi ayăt. Tơlơi ngă kơ ơi Đinh Kim Anh dưi găn rơgao hrơi blan anun, ngă kơ ñu đăo gơnang anun lĕ anŏ yôm mơng tơlơi rơngai, rơnuk rơnua-hơdôm tơlơi khua mir sir Hồ Chí Minh hơmâo pơtong sit amăng tơlơi pơsit rơngai lŏn ia, akŏ pơjing dêh čar Việt Nam Dân chủ Cộng hòa. “Ƀu hơmâo hơget yôm hloh kơ tơlơi rơngai, Wa lăi tui anun. Tơlơi anai yôm phăn biă mă. Anun tơlơi hơdip đưm hlâo adih glêh tơnap, kơƀah hra, kơƀah braih ƀong, kơnong kơ ƀong hơbơi čin, samơ̆ đăo gơnang nao bruă ngă hơkrŭ amra dưi. Tơlơi anai lĕ yôm biă mă”.

Pran đăo gơnang anun ƀu djơ̆ kơnong djru brơi ƀing ling tơhan ƀu hŭi lơm ayăt mă krư̆ đôč ôh mơ̆ ăt pơtrut pơsur djop rơnuk hlăk ai čơđai ruah jơlan nao ngă tơhan lơm lŏn ia ta glăk blah wang.

Lơm glăk 17 thun, tơdăm Bùi Ngọc Thảo dŏ ƀơi Diễn Châu, Nghệ An mut ngă tơhan, jing tơhan blah hơdeč amăng ia hăng nao djru blah pơ kual Tong krah. Đa hơmâo ƀing gŏp ƀu dưi pơwot glăi, đa hơmâo tal blah ngă ngă djai lu mơnuih, samơ̆ amăng pran jua ñu lơm anun ăt gir run kiăng pơklaih rơngai plơi pla, pơlir lŏn ia ta jing sa.

81 thun tơdơi kơ tal tơgŭ hơkrŭ blan 8, lŏn ia ta hơmâo yak nao hrơi blan phara yơh. Mơng sa boh dêh čar rin rơpa, kơƀah djop mơta, Việt Nam hơmâo pơjing tơlơi rô nao rai pơtom hiăp hăng giăm 200 boh dêh čar, kual lŏn, mut hrŏm dơlăm amăng hơdôm bruă pơlir bơwih ƀong huă hăng glông bơwih ƀong amăng rŏng lŏn tonah, ƀơƀrư̆ pơsit tong kơdrưh ang mơng sa boh dêh čar bơwih ƀong dik dak amăng kual.

Tơdah rơnuk nao hlâo khŏm blah ngă kiăng hơmâo tơlơi rơnuk, gơgrong mă kiăng pơklaih rơngai, bơ ră anai, pran jua hrưn đĭ hơmâo tŏ tui amăng sa bruă jao phrâo: Pơjing dêh čar Việt Nam rơnuk rơnua, ngă pô, pơdrông sah, hơmâo djop tơlơi gal kiăng dưi pơmut hrŏm hăng bơkơtưn amăng rŏng lŏn tơnah hơmâo lu tơlơi pơplih.

Lăng glăi thun blan anun, ơi Bùi Ngọc Thảo, ră anai dŏ hơdip amăng phương Buôn Ma Thuột, tơring čar Dak Lak brơi thâo, hơdôm tơlơi yôm mơng tal tơgŭ hơkrŭ blan 8 ăt lĕ atur phun kiăng lŏn ia ta yak nao rơwang pơđĭ kyar phrâo. “Kar hăng khua git gai Ping gah ơi Tô Lâm lăi, ƀing ta yak nao rơwang hrưn đĭ mơng pô, anai lĕ tơlơi kơdăt đĭ kơtang hloh mơng atur phun gru grua ngă hơkrŭ mơng Việt Nam. Mơng gru grua yôm phăn anai kiăng ƀing ta dưi hrưn đĭ kơtang hloh”.

Hăng rơnuk hlăk ai ră anai, tơlơi pơhrăm glăi mơng bơyan yan thun 1945 ƀu djơ̆ kơnong amăng hơdôm hơdrôm hră čih pioh. Ƀơi Dak Lak, Khul hlăk ai tơring čar pơsit bruă pơtô glăi gru grua kiăng ngă ƀing hlăk ai hluh rơđah anŏ yôm mơng tơlơi hơdip rơnuk rơnua, lăng yôm boh than dưi ngă mơ̆ ơi yă ta khŏm tuh drah pơčah asar hăng yôm ƀiă dong lĕ pơjing pran pơ-ư ang jing bruă mă sit nik.

Bruă mă ăt hơmâo pơplih phrâo tui jơlan gah jê̆ giăm hăng hlăk ai ƀiă dong, mơng plang mơnuih mơnam, video, podcast truh pơ hơdôm bruă glăi ĕp lăng anih sô hơđăp, bưp ƀing mơnuih tha rơma hăng nao lăng tơl anih sô hơđăp. Hơnong pơkă ƀu djơ̆ kơnong kiăng ƀing hlăk ai thâo kơ gru grua đôč ôh mơ̆ ăt kiăng mơng gru grua hơđăp pơjing rai pran gơgrong amăng rơnuk tŭ tă ră anai hăng kơñ pơgi ni anăp. Ayong Nguyễn Thao Giang, kơ-iăng Khua khul hlăk ai tơring čar Dak Lak brơi thâo: “Tơlơi yôm hloh lĕ pơlir brơi gru grua sô hơđăp hăng tơlơi hơdip phrâo mơng hlăk ai. Kiăng ngă ƀing hlăk ai hluh, anŏ yôm mơng tơlơi rơngai ră anai dưi pơtô glăi pran glăm ba hăng mơnuih mơnam, pran gum pơgôp, gru grua hơdip hiam amăng plang mơnuih mơnam. Mơng bruă tuh drah pơčah asar mơng rơnuk ơi yă amra pơsur pran jua djru bruă, tuh rơyuh pran jua, glăm ba bruă amăng plơi pla ala ƀon”.

Rĭm rơnuk ăt hơmâo bruă mă phara kiăng tŏ tui pran jua mơng bơyan yan rơngai. Tơdah rơnuk ơi yă hơmâo yua pran khăp kơ lŏn ia, pran khin hơtai hăng tuh drah pơčah asar kiăng hơmâo tơlơi rơngai, rơnuk ta ră anai kiăng pơjing hơdôm anŏ yôm anun jing pran kơtang pơjing lŏn ia ta: hăng tơlơi thâo thăi ngă pô kơñ pơgi ni anăp, hăng tơlơi pơčeh kiăng pơjing rai hơdôm anŏ yôm phrâo, hăng tơlơi glăm ba kiăng wai pơgang tơlơi dưi mơng rơnuk nao hlâo.

Anai ăt lĕ pran jua mơng tal tơgŭ hơkrŭ blan 8 tŏ tui amăng tơlơi hơdip tŭ tă ră anai, ƀu djơ̆ kơnong amăng hơdôm tơlơi bơră ruai glăi amăng rĭm blan čơpăn đôč ôh mơ̆ ăt amăng bruă mă, pran hrưn đĭ hăng hơdôm tơlơi pơgôp tong ten mơng rĭm čô mơnuih Việt Nam ră anai. /.