Tơlơi anai hơmâo pơphun dik dak ƀơi Dak Lak amăng Jơnum ngui sầu riêng laih rơgao. Ƀơi hơdôm boh să Krông Pač, Ea Knuêč, Cư Mgar, Krông Buk, Quảng Phú, Ea Tul, Krông Năng, phường Cư Bao hăng hơdôm anih pơdă gơnam OCOP mơng tơring čar Dak Lak hơmâo pơphun 16 mông livestream amăng Facebook, Tiktok Shop hăng hơdôm plang sĭ mơdrô điện tử. Hơdôm mông livestream pơhưč rơbêh 4 klăk wŏt mơnuih kiăo tui lăng, giăm 8.700 wŏt arăng rơkâo blơi, rơbêh 146 tơ̆n sầu riêng hơmâo sĭ, pơhrui glăi giăm 11 klai prăk.

Tơlơi yôm ƀiă hơdôm mrô jŭ yap anun lĕ ƀing mơnuih dŏ dong ƀơi anăp hơdôm măi telephôn. Anai ƀu djơ̆ kơnong ƀing KOL, KOC (ƀing mơnuih hmư̆ hing ƀudah ƀing rơgơi sĭ gơnam). Lu mơnuih apăn bruă, khua mua să, ƀing hlăk ai, anom bơwih ƀong sĭ mơdrô, anom bơwih ƀong hrŏm hăng ƀing mơnuih ƀôn sang ăt mut sĭ mơdrô gơnam mơn.

Ƀơi să Ea Knuêč, Khua git gai Ping gah, Khua jơnum min pơ ala mơnuih ƀôn sang să Ngô Thị Minh Trinh lĕ mơnuih mut hrŏm livestream, lăi pơthâo hăng sĭ mơdrô boh sầu riêng brơi mơnuih ƀôn sang. Lu ƀon lan pơkŏn, ƀing apăn bruă ăt jing mơnuih sĭ gơnam, hrŏm hăng mơnuih ƀôn sang bơră rai lăi nao kual lŏn, phun pla hăng gơnam mơng plơi pla.

Ƀing ta dưi lăi lĕ, ƀing mơnuih apăn bruă glăk jing ƀing mơnuih pơ ala brơi gơnam đang hmua ƀơi kual Dap kơdư. Tơlơi anai ăt brơi ƀuh livestream ƀu djơ̆ kơnong lĕ bruă sĭ gơnam đôč ôh. Mơng rĭm mông sĭ gơnam anun, mơnuih blơi yua amra thâo kơ kual lŏn, mơnuih pla, bruă bơwih brơi, tơlơi bơră ruai lăi nao gơnam tam hăng wŏt gru grua mơng kual lŏn Dap kơdư.

Kiăng djru brơi ƀing mơnuih hơmâo gơnam OCOP thâo amăng bruă lăi pơthâo, pơƀuh brơi hăng sĭ mơdrô gơnam tam amăng plang internet, phrâo rơgao, gơnong bruă mă yua boh thâo phrâo tơring čar Dak Lak hơmâo pơphun jơlan hơdră pơtop hrăm kơ bruă livestreal sĭ gơnam amăng plang mơnuih mơnam, brơi anom bruă sĭ mơdrô, anom bruă bơwih ƀong hrŏm hăng hơdôm boh sang anŏ sĭ mơdrô gơnam. Ƀing kiăo tui hrăm hơmâo črâo brơi bruă sĭ mơdrô phrâo hăng pơjing anăn apăn sĭ mơdrô amăng internet; bruă dăp hơdră, boh tơhnal livestream; bruă lăi pơthâo, pơlăi nao rai hăng pơsir hĭ anŏ phrâo ƀuh lơm sĭ gơnam online. Ƀing kơhnâo kơhnăk ăt črâo brơi bruă pơjing rup rap ta pô pơlir hăng gơnam sĭ mơdrô, mă yua klă plang mơnuih mơnam, plang sĭ mơdrô điện tử hăng ngă tui tơlơi pơmĭn pơplih mrô amăng lăi pơthâo gơnam OCOP.

Jơlan hơdră pơtop hrăm pơphun hăng 5 mông livestream ƀơi Anom bruă pơplih pơčeh phrâo hăng sa, dua boh ƀon lan anun lĕ Tuy Hòa, Tây Hòa, Krông Năng, Buôn Ma Thuột. Mơng anun, ƀing sĭ gơnam hơmâo črâo ngă tui sit nik, ƀơƀrư̆ pơplih tơlơi pơmĭn hăng pơjing plang sĭ mơdrô online lăp djơ̆ hăng gơnam tam gơñu hơmâo.

Ơi Trần Văn Sơn, kơ-iăng Khua gơnong bruă boh thâo phrâo tơring čar Dak Lak brơi thâo, tơdơi kơ hơdôm jơlan hơdră ngă lông lăng, gơnong bruă amra lăng glăi, pơgiong bruă mă kiăng hơdôm boh să dưi mă yua, pok pơhai lăp djơ̆ tơlơi gal sit nik. “Tơdơi kơ ngă lông lăng, ƀing gơmơi amra lăng glăi bruă mă kiăng hơdôm boh să dưi mă yua hăng pok pơhai ngă, sit biă ñu lĕ kiăng hơmâo sa anom bruă gum hrŏm. Hăng anom bruă gum hrŏm anun amra djru brơi hơdôm boh să kiăng pơjing hơdôm anih sĭ gơnam livestream, sit biă ñu lĕ hơdôm gơnam hiam hơdjă, gơnam OCOP amăng tơring čar ba sĭ mơdrô amăng plang sĭ mơdrô điện tử”.

Samơ̆, livestream sĭ mơdrô gơnam ƀu djơ̆ tơlơi atur phun kiăng pơsir hĭ bruă ba sĭ gơnam đang hmua. Sa mông sĭ mơdrô hơmâo hơdôm rơbâo čô mơnuih blơi gơnam, samơ̆ kiăng bong glăi mơnuih blơi yua, gơnam tam ăt kiăng pơhlôm brơi klă, gơnam kiăng tong ten anih pla, anih anung gơnam, răk pioh, pơdŭ pơgiăng brơi kơ klă. Sui ƀiă dong lĕ bruă pơjing anăn apăn sĭ mơdrô hăng pơlir bơwih ƀong hơđong kjăp./.