Ƀơi guai dêh čar Dak Lăk, thun hrăm anai kơđŏm gru lăp hơdor biă mă: hơdôm boh sang hră kơnuk kơna čem rông hơmâo man pơdong glăk ba yua laih, djru brơi čơđai hơmâo anih hrăm hră, ƀong huă, đih pit mơak hloh. Klâo boh sang hră kơnuk kơna čem rông ƀơi hơdôm boh să Ia R’vê, Ia Lốp, hăng Ƀuôn Đôn hơmâo ba yua, čơkă rơbêh 3.000 čô čơđai amăng thun hrăm 2026-2027 anai. Anai jing hơdôm ring bruă hơmâo tuh pơ alin man pơdong kơnar, ƀu kơnong hơmâo anih hrăm đôč ôh, hơmâo tom anih ƀong huă, đih pit, sang pơđok hră, sang bơkjăp rơjang drơi jăn hăng hơdôm anih bơwih brơi tơlơi dŏ dong ƀong huă mơ̆ng ƀing čơđai sang hră.

Kơnong ƀơi Sang hră kơnuk kơna čem rông pơƀut dua gưl Ia R’vê hơmâo prăk tuh pơ alin 185 klai. Kiăng hmao ba yua, hơdôm pluh čô khua, ling tơhan hrŏm hăng kông ñơn gum man pơdong, ngă bruă na nao pơ anih man sang hră. Glăi čuă sang hră amăng thun hrăm phrâo, Thượng tướng Phùng Sĩ Tấn, Kơ-iăng khua pơphô bruă Khul tơhan Việt Nam brơi thâo, sang hră anai pơ ala brơi tơlơi khăp ƀu-eng plah wah tơhan hăng mơnuih ƀôn sang: “Ping gah khul tơhan, Ding jum Ling tơhan, Khul ling tơhan đăo kơnang, lơ̆m hơmâo sang hră phrâo amra dưi bơwih brơi anŏ kiăng mơnuih ngă khua  rơgơi, nai pơtô rơgơi djuai ania ƀiă. Mơ̆ng anun amra hơmâo mơnuih mă bruă klă, đah mơ̆ng dưi djru đĭ kyar bơwih ƀong huă mơnuih mơnam, hơkrŭ kjăp bruă pơgang lŏn ia, biă ñu pơ anih dŏ lu tơnap tap kah hăng Ea Rốk”.

Hơdôm mrô anun brơi ƀuh, tơdah ta lăng mă amăng hră đôč, dưi ƀuh prăk man pơdong, mrô čơđai hrăm đôč. samơ̆ gah tlôn ñu lĕ tơlơi ră ruai kơ ƀing čơđai pơ guai dêh čar. Hăng lu čơđai, dưi hrăm amăng sang hră hiam, hơmâo anih ƀong huă, đih pơdơi hlao pơ sang hră djơ anai jing jơlan nao pơ sang hră plai mơn ataih, bruă hrăm hơđong hloh mơn laih anun dưi mut amăng bruă pơtô hrăm pok prong hloh.

Laih anun tơdah ƀơi guai dêh čar, hơdôm boh sang hră phrâo glăk pok thim tơlơi gêh găl kơ ƀing čơđai, jing ƀơi Trường Sa, rim anih hrăm ñu hơmâo anŏ yom phara mơn. Pơ ia rơsĭ ataih yaih, ƀing nai hăng čơđai sang hră ăt čơkă thun hrăm phrâo amăng jua hơgor mơñi. Hơdôm boh anih hrăm pơ bul pơtâo ia rơsĭ ƀu kơnong jing anih pơtô boh hră đôč ôh, ăt jing anih bang bơngač, pơsit brơi tơlơi hơdip kjăp kơtang mơ̆ng mơnuih ƀôn sang Việt Nam pơ anih pơgang gah anăp ia rơsĭ Lŏn ia ta.

Mơ̆ng Dap Kơdư truh pơ Trường Sa, ataih hơdôm rơtuh, hơdôm rơbâo km. Anih hrăm ñu phara mơn. Samơ̆ amăng hrơi mut sang hră, abih bang hrŏm sa tơlơi: abih bang čơđai, mah pơ guai ƀudah pơ ia rơsĭ, leng kiăng hơmâo tơlơi gêh găl či hrăm hăng đĭ kyar.

Yua hnun, jua hơgor amăng hrơi mut thun hrăm phrâo thun anai ƀu kơnong lăi pơhmư̆ sa thun hrăm phrâo đôč ôh. Anun jing jua hơgor mơ̆ng sang hră phrâo pơ guai dêh čar; mơ̆ng anih hrăm pơ bul ia rơsĭ; mơ̆ng tơlơi tuh pơ alin kơ ană mơnuih laih anun ăt jing bơbôr tui anŏ klă hiam pơgi kơdih anai pơ hơdôm boh tơring, kual yom phara mơ̆ng lŏn ia.

Mơ̆ng plơi pla Dap Kơdư truh pơ bul pơtâo ia rơsĭ Trường Sa, hơdôm pok hră phrâo hơmâo pok blang. Hrŏm hăng anun lĕ tơlơi kiăng khăp, čang rơmang phrâo mơ̆ng rơnuk hlăk ai čơđai anet glăk prong tui ƀơi guai dêh čar ta./.