Amăng yang hrơi dong bơyan phang ƀơi ƀon Bu Bong, să Đức An, tơring čar Lâm Đồng, jao dai nao dai rai ƀơi anăp sang, yă Thị Hel dŏ wai tơčô rah, lăng rah măi telephôn hmư̆ jơlan hơdră pơtui jua pơhiăp hăng tơlơi M’nông mơng Gong phun jua pơhiăp dêh čar Việt Nam. Hăng ñu, hơdôm tơlơi pôr pơhing jê̆ giăm, samơ̆ djơ̆ sit nik hăng sang anŏ ñu: “Kâo juăt hmư̆ brô̆ rĭm hrơi. Đa hmư̆ arăng pôr pơhing kơ bruă 5 čô čơđai ia ƀlung, anun ƀing pôr pơhing pơtă pơtăn neh met wa amăng bơyan phang kiăng kơ wai lăng ană tơčô, anăm brơi ƀing gơñu nao mơnơi hajăn pơ ia krông čroh hnoh. Kâo ƀuh hơdôm tơlơi pơtă pơtăn tui anun sit nik biă mă. Ană kâo, ñu pok facebook brơi kơ kâo, lơm hơmâo wăn kâo pok lăng hăng hmư̆ tơlơi pôr pơhing hăng tơlơi M’nông mơng Gong phun jua pơhiăp dêh čar Việt Nam, đa hơmâo tơlơi akhan, tơlơi adôh, đa video hăng er adôh kơ ƀing mơnuih kâo krăn dong. Kâo hor mut lăng biă mă”.

Hăng amai Thị Nia (dŏ amăng ƀon Tu Suay, să Đức An, tơring čar Lâm Đồng), jơlan hơdră pơtui jua pơhiăp hăng tơlơi M’nông kar hăng “sŏp hră čih pioh” sit nik. Ñu đing tơngia hmư̆ mơng hơdôm črăn hơdră bơwih brơi tơlơi suaih pral, bruă pơgang duam hơdrăp, duam đung drah, truh hơdôm tơlơi črâo ba bruă “Pla phun hơget, rông hlô hơget” kiăng kơ ngă tui. Radio anet jing “gơyut” jê̆ giăm rĭm hrơi, djă ba hơdôm er adôh rơnang mơ-ak ƀơi kual Dap kơdư. Amai Thị Nia hok mơ-ak bơră ruai glăi: “Kâo hmư brô̆ lu biă mă. Lơm nao pơ hmua, đa măi telephôn ƀu dưi mut internet ôh, anun kâo djă ba măi radio. Đa dŏ ƀơi anih ƀu anăm hrĭp mă, kâo khŏm pơdong angten brơi ñu glông ƀiă, laih dong akă ƀơi phun kyâo kiăng kơ hmư̆ rơđah ƀiă. Čoh jĭ rah, hmư̆ brô̆ rah, ăt ngă mơ-ak amăng pran jua. Lơm dŏ pơ sang kâo hmư̆ hăng lăng amăng facebook. Kâo lăng plang facebook M’nông ñu mơ-ak biă mă. Lu video adôh suang hăng tơlơi M’nông amăng facebook kâo like mơ-ai. Kâo ăt kiăo tui lăng adơi H’Thị akhan hăng tơlơi M’nông. Dơnong kơ pok măi telephôn amra dưi hmư̆ mơtăm, ƀudah lơm hơmâo wăn ăt dưi lăng glăi mơn”.

Đa hơmâo mơnuih hmư̆ jơlan hơdră kiăng thâo bruă pơgang klin kman, tơlơi bơwih ƀong huă, đa hơmâo mơnuih kiăng hmư̆ tơlơi adôh, tơlơi akhan; đa hơmâo mơnuih kiăng hmư̆, hrăm boh pơhiăp djuai ania pô. Jua pơhiăp pơtui hăng tơlơi M’nông VOV Tây Nguyên kret kruai mut amăng tơlơi hơdip mơda. Amai H’Juel Sinur (Pô pôr pơhing hăng tơlơi M’nông, Anom pôr pơhing-pơdah rup tơring čar Lâm Đồng) bơră ruai glăi: “Tơdơi kơ ha hrơi mă bruă, kâo juăt hmư̆ jơlan hơdră pơtui jua pơhiăp hăng tơlơi M’nông mơng Gong phun jua pơhiăp dêh čar Việt Nam kiăng kơ hmư̆ tơlơi adôh, tơlơi akhan. Lu wŏt glăi pơ plơi pla, neh met wa juăt tơña kâo tui anai: “Gah anom bruă gih ƀu hơmâo akhan tơlơi akhan đưm, tơlơi adôh kar hăng VOV ôh hă, gah VOV ƀing gơñu akhan hmư̆ mơ-ak biă”. Tui hăng kâo pơmĭn, anai lĕ tơlơi truh kih prong mơng ƀing pôr pơhing amăng jơlan hơdră pơtui jua pơhiăp hăng tơlơi M’nông VOV Tây Nguyên, yua ƀu djơ̆ kơnong pôr pơhing đôč ôh mơ̆ ăt pơgôp djă pioh hơdôm tơlơi adôh, tơlơi akhan hăng gru grua djuai ania pô dong”.

Tơdah hlâo adih, neh met wa kiăng dŏ tơguăn djơ̆ mông kiăng hmư̆ radio, ră anai kiăng kơnong mut măi telephôn đôč amra hmư̆ jua pơhiăp hăng tơlơi M’nông tui hluai hor.

Amăng website VOV M’nông hăng Fanpage “Tiếng M’nông VOV Tây Nguyên” jing jê̆ giăm hăng neh met wa. Rĭm wŏt hrơi tơjug, website hơmâo pơhưč rơbêh 70.000 wŏt mơnuih mut lăng; fanpage hơmâo rơbêh 6.000 wŏt mơnuih kiăo tui lăng. Lu tơlơi čih, video pơhưč hơdôm hơpluh rơbâo čô mơnuih mut pơđok hăng lăng. Mrô jŭ yap anai brơi ƀuh: tơlơi juăt jing pơplih laih, samơ̆ tơlơi kiăng dưi hmư̆ boh pơhiăp djuai ania pô ăt dŏ na nao.

Hăng ayong Y Sưng Phêja, mơnuih pôr pơhing jơlan hơdră pơtui jua pơhiăp hăng tơlơi M’nông VOV Tây Nguyên, tơlơi pơplih anai lĕ thun blan pơhrăm mă pô hăng hluai tui djơ̆ tơlơi kiăng sit nik. “Blung hlâo, lơm hơdai nao pôr pơhing amăng lu glông pơƀuh phara, bruă hrăm tui boh thâo phrâo hăng ƀing gơmơi ăt ƀu amuñ lơi. Samơ̆ mơng tơlơi pơplih sit nik anun ba glăi lu tơlơi dưi ƀiă dong, ngă kơ jơlan hơdră pơtui jua pơhiăp hăng tơlơi M’nông jê̆ giăm ƀiă dong ƀing mơnuih hmư̆ brô̆. Kâo hor kiăo tui tơlơi pơplih phrâo anai, yua ƀu djơ̆ kơnong pôr pơhing tui glông pơtui jua pơhiăp đôč ôh mơ̆ ăt ngă lar hyu tơlơi M’nông hăng gru grua djuai ania M’nông amăng plang internet kiăng lu mơnuih thâo, sit biă ñu rơnuk hlăk ai čơđai. Hăng kâo pô, anai lĕ tơlơi pơtrut pơsur pran jua kiăng rĭm hrơi pơhrăm ta pô hăng ngă pơplih bruă mă.”

Pơ ala glăi pran jua hur har anun lĕ tơlơi pơsur mơng ƀing hmư̆ brô̆ mơ-it tơlơi čih pơtă amăng fanpage hăng tơlơi M’nông.

Facebook Điểu Chí Jam čih lăi glăi tui anai: “Hơdôm tơlơi adôh hmư̆ mơ-ak biă, tơlơi ngui ngor anai pơ hơpă anun ƀing gơyut…Ƀing gih ba pơdah lu tơlơi adôh, tơlơi akhan M’nông amăng facebook dong hŏ, hmư̆ mơ-ak biă laih!”.

Facebook Điểu Ntri mơ-it tơlơi pơsur pran jua tui anai: “Ƀing adơi ayong gir run biă dong hŏ, ngă bruă klă tui kiăng lu mơnuih thâo djuai ania M’nông hơmâo lu tơlơi phiăn, gru grua yôm phara. Ƀing ta gir run ngă bruă kah mơng dưi djă pioh boh pơhiăp mơng djuai ania pô. Hăng tơlơi čang rơmang dưi djă pioh boh pơhiăp, lăi pơthâo gru grua, kâo ƀuh klă biă mă!”.

Hơdôm tơlơi pơtrut pơsur pran jua mơ-it rai čang rơmang jơlan hơdră pơtui jua pơhiăp hăng tơlơi M’nông mơng Gong phun jua pơhiăp dêh čar Việt Nam dưi yak nao hrơi blan pơplih kơtang ƀiă dong lơm găn rơgao 20 thun pôr pơhing. Ơi Y Thịnh Bon Yôk Ju, Kơ-iăng Khua Jơnum min mơnuih ƀon sang tơring čar Dak Nông, mơnuih sui thun kơsem min gru grua djuai ania M’nông brơi thâo: “Ƀu djơ̆ kơnong ƀing hlăk ai, wŏt lu mơnuih ha hnưr gơmơi lĕ ƀing 6x, 7x, ăt lêng kơ thâo yua facebook, zalo, Youtube kiăng kơ dưi mut pơđok tơlơi pơhing, hmư̆ tơlơi adôh ƀudah hmư̆ glăi hơdôm jơlan hơdră pơtui jua pơhiăp hăng tơlơi M’nông. Yua anun, rơngiao kơ bruă pôr pơhing tui hơđăp, jơlan hơdră pơtui jua pơhiăp hăng tơlơi M’nông kiăng hơmâo pơtrut kơtang ƀiă dong amăng plang mơnuih mơnam kiăng mơnuih ƀôn sang amăng lŏn ia kah hăng pơ tač rơngiao lêng kơ dưi hmư̆. Hrŏm hăng anun, ƀing pôr pơhing ăt khin hơtai mă yua boh thâo phrâo, thâo yua boh thâo ia rơgơi AI, kiăng dưi dăp hơdră pôr pơhing mơ-ak ƀiă. Samơ̆ mah pơplih phrâo hiưm pă, tơlơi yôm hloh ăt lĕ bruă pôr pơhing, pơtô pơblang brơi djơ̆, tơpă sit, djă pioh boh pơhiăp, gru grua hăng hơdôm anŏ yôm sô hơđăp mơng djuai ania M’nông. Čang rơmang ƀing pôr pơhing tŏ tui pran khăp kơ bruă mă, glăi pơ plơi pla lu ƀiă, jê̆ giăm neh met wa ƀiă, anăm pơdơi pơhrăm pô hăng pơplih bruă mă kiăng tơlơi djuai ania M’nông jai hrơi lar hyu ataih amăng plang pơhing phrâo ră anai. kâo đăo gơnang, lơm tơlơi djuai ania M’nông dưi pôr hyu amăng gong pơtui jua pơhiăp hăng amăng plang mơnuih mơnam, gru grua djuai ania pô amra dưi djă pioh hăng tŏ tui mơng rơnuk anai truh rơnuk adih”.

Dua hơpluh thun-mah pôr pơhing tui glông sô hơđăp ƀudah amăng hơdôm video ber amăng facebook, website…tơlơi M’nông VOV Tây Nguyên glăk pok rai jơlan phrâo kiăng truh tơl plơi pla. Hăng pran jua hur har mơng ƀing dăp hơdră, ƀing pôr pơhing hăng tơlơi gum hrŏm mơng neh met wa, boh pơhiăp, tơlơi čih hăng bơngăt jua gru grua djuai ania M’nông amra tŏ tui hmư̆ bang, ngă lar hyu amăng tơlơi hơdip ră anai./.