Lơm hơmâo mơnuih apăn bruă hăng ling tơhan wai pơgang guai glăi pơ plơi pla pơtrut pơsur nao dŏ pơ anih phrâo, črâo brơi ngă hmua pơdai ia, rông hlô, tơlơi hơdip phrâo mơng neh met wa djuai ania La Hủ ƀơi plơi Pha Bu, să Pa Ủ, tơring čar Lai Châu jai hrơi pơplih. Hăng amăng hrơi blan anai, tha plơi Ly Xạ Pu lĕ sa amăng ƀing mơnuih ba jơlan hlâo. Ƀu hŭi pơ-iă hang, hơjan hlim, ñu nao tơl sang pơtrut pơsur neh met wa lui hĭ tơlơi phiăn ƀu hiam, wai pơgang plơi pla, djru brơi tơlơi bơwih ƀong ngă hmua, wai pơgang guai lŏn ia. “Kiăng gir run abih pran jua kiăng pơtrut pơsur neh met wa hluh rơđah, hơdôm bruă hơget ta dưi ngă hăng bruă hơget ƀu dưi ngă. Kiăng pơhlôm djru brơi tơlơi hơdip kơ neh met wa jai hrơi pơđĭ kyar, yua anun ƀing gơmơi kơnong kơ gir run abih pran jua kiăng pơtrut pơsur neh met wa bơwih ƀong, ngă hmua kiăng tơlơi hơdip jai jơnap tui. Kâo ăt lêng kơ hyu pơtô pơblang, pơtrut pơsur neh met wa gir run ƀiă dong”.

Mơng thun 2020 truh ră anai, tha plơi Ly Xạ Pu hơmâo mut hrŏm hơdôm rơtuh mông pơtô pơblang amăng plơi pla kual giăm guai. hơdôm boh pơhiăp jê̆ giăm samơ̆ ăt bă tơlơi glăm ba mơng ñu hơmâo pơgôp ngă pơplih tơlơi pơmĭn mơng neh met wa La Hủ ƀơi anai.

Ră anai, amăng hơdôm boh plơi Pha Bu, Nhú Ma, Vạ Pù ƀudah Tân Biên…lu sang anŏ hơmâo ngă hmua pơdai ia, rông hlô mơnong, pla phun kyâo jrao, yua măi telephôn rơgơi kiăng sĭ mơdrô gơnam tam. Ƀing čơđai dưi nao sang hră. Kiăng mơnuih ƀôn sang đăo gơnang hăng ngă tui, sang anŏ ơi Pu lêng kơ ba jơlan hlâo amăng bruă pơđĭ kyar bơwih ƀong huă hăng hơbô̆ bruă rông rơmô, un, pla phun kyâo jrao hăng sa nhân tím gah yŭ glai rưng.

Hlâo anun lĕ sa boh sang anŏ rin amăng plơi pla, sang anŏ ayong Phàn Lê Sa hlâo adih kơnong gơnang nao hơdôm blah hmua tơjŭ pla sa bơyan. Hmư̆ tui tơlơi pơtrut pơsur mơng tha plơi Ly Xạ Pu, ñu hơmâo khin hơtai pơplih hơdai nao pla quế, sa nhân tím. Tơdơi kơ hơdôm thun gir run ngă hmua, rơbêh 3 ektar phun quế, sa nhân dưi pơhrui, ngă sang anŏ ñu pơklaih mơng ƀun rin. “Wa Pu lĕ mơnuih anih pran jua, lêng kơ nao tơl plơi pla kiăng pơtrut pơsur, djru brơi neh met wa mơng bruă anet hloh truh pơ bruă tơnap tap. Wa lêng kơ abih pran pơblang brơi neh met wa hơdôm tơlơi hiam hăng juăt hyu pơsur neh met wa ngă klă djop mơta bruă amăng plơi pla. Čang rơmang pơ anăp anai wa ăt hiam drơi jăn, gir run nao tơl plơi pla kiăng pơtrut pơsur na nao kiăng neh met wa thâo hăng ngă tui”.

Yua tơlơi gir run mơng gưl Ping gah, gong gai ƀon lan hăng ƀing mơnuih arăng đăo gơnang amăng plơi pla kar hăng tha plơi Ly Xạ Pu, mrô sang anŏ ƀun rin djop mơta amăng să pơhrŏ trun giăm 64%; plơi pla ăt dưi ngă 7 amăng 19 hơnong pơkă man pơdong plơi pla phrâo.

Ƀu djơ̆ kơnong lĕ mơnuih arăng đăo gơnang amăng plơi pla, ơi Ly Xạ Pu ăt lĕ anih tơkuh nao rai kơplah wah gưl Ping gah, gong gai hăng mơnuih ƀôn sang, hrŏm hăng tơhan wai pơgang guai pơhlôm rơnuk rơnua, wai pơgang guai lŏn ia. Ơi Đao Văn Thức, kơ-iăng Khua jơnum min pơ ala mơnuih ƀôn sang să Pa Ủ, tơring čar Lai Châu brơi thâo: “Ơi Ly Xạ Pu lĕ sa čô mơnuih hmư̆ hing amăng pơtrut pơsur neh met wa hơđong tơlơi hơdip; pơtrut pơsur neh met wa rơmet pơagaih amăng plơi pla, pơđĭ kyar bơwih ƀong huă. Sang anŏ ñu lĕ sa boh sang anŏ ba gru, pơđĭ kyar rông un, rơmô. Ră anai ñu ăt glăk tŏ tui pơsur neh met wa pơplih mơng bruă ngă hmua pơdai yuă hơpuă ƀu hơmâo, hơdai nao phun pla sĭ hơmâo nua kiăng pơđĭ kyar bơwih ƀong”.

Mah rơgao 70 thun, ƀu añrăng găng kar hăng hlâo adih, samơ̆ tha plơi Ly Xạ Pu ăt abih pran jua nao tơl plơi pla, pơblang brơi neh met wa hơdôm tơlơi klă hiam ƀudah tơlơi črâo trun phrâo; pơtrut pơsur mơnuih ƀôn sang gir run bơwih ƀong huă, wai lăng glai rưng, plơi pla, guai lŏn ia. Hơdip abih pran hăng plơi pla, mơnuih Ping gah djuai ania La Hủ anun glăk kret kruai hrăm hăng ngă tui tơlơi pơtô mơng Wa Hô hăng hơdôm bruă mă jê̆ giăm. Kar hăng apui jă bơngač amăng kual čư̆ siăng giăm guai, ñu ăt glăk pơtrut pran đăo gơnang amăng plơi pla djuai ania La Hủ ƀơi kual yŭ dêh čar./.