Rơđah biă mă ñu, grup khua mua pơ ala mơnuih ƀôn sang dêh čar tơring čar Dak Nông hơmâo ngă tui 2 wơ̆t bưp mơnuih ruah khua ƀơi să Trường Xuân, tơring glông Dak Song, să Dak Som tơring glông Dak Glong, lăi pơthâo boh tơhnal jơnum khua mua pơ ala mơnuih ƀôn sang lok 7, tal XV, biă mă ñu amăng mông jơnum lok phrâo anai, ƀing pơ ala mơnuih ƀôn sang dêh čar hơmâo pơsit kơčăo bruă tuh pơ alin čuk pơkra jơlan rơdêh đuăi hmar mơ̆ng Kơdư nao pơ Dơnung gah yŭ črăn găn nao mơ̆ng Gia Nghĩa Dak Nông truh pơ Chơn Thành tơring čar Bình Phước, ataih 128,8 km, rơnoh prăk tuh pơ alin lĕ 25.540 klai prăk.

Lu mơnuih ruah khua čang rơmang kơčăo bruă anai dưi pok pơhai, kiăng tañ giong, djop brơi bruă rô nao rai mơ̆ng mơnuih ƀôn sang sĭ mơdrô bơwih ƀong huă, wơ̆t bruă nao pơkă lăng pơjrao duăm ruă pơ sang ia jrao prong hloh.