Tal pơplông abih anih 12 thun 2023 ăt pơhlôm hơđong kar hăng thun 2022, samơ̆ tơlơi pơkă hơmâo sa, dua tơlơi pơplih phrâo kiăng ƀing čơđai pel ĕp tong ten. Nai Lê Thị Minh Huế, nai wai lăng anih 12A5, sang hră gưl tlâo Mạc Đĩnh Chi, tơring glông Chư Pah, brơi thâo:

“Kiăng djru brơi ƀing čơđai thâo tong ten hơdôm tơlơi pơplih phrâo amăng tơlơi pơkă pơplông thun anai, ƀing nai pơtô hăng lu hơdră bruă, sit biă ñu amăng 15 mơnit hlâo kơ mông mut hrăm, mông pơbưp hăng ƀing čơđai amăng rĭm rơwang hrơi tơjuh hluai tui hơdôm plang anun lĕ Zalo kiăng lăi pơthâo brơi ƀing čơđai thâo hơdôm tơlơi pơplih phrâo amăng tal pơplông anai kiăng ƀing gơñu ngă tui djơ̆ tơlơi pơkă”.

Amon Nguyễn Thị Anh Thơ-anih hrăm 12A7, sang hră gưl tlâo Mạc Đĩnh Chi, tơring glông Chư Pah brơi thâo.

“Tui kâo pel ĕp hăng hơmâo thâo hơdôm gơnam pioh yua amăng tal pơplông anun lĕ gai čih, gai rek, măi jŭ yap djă ƀơi tơngan, ƀu dưi yua čih boh hră, ƀu dưi djă mut amăng anih pơplông măi hrĭp mă boh hiăp, mă rup, sit biă ñu lĕ măi telephôn”.

Hrŏm hăng bruă lăi pơthâo kiăng ƀing čơđai thâo rơđah tơlơi pơkă, djop sang hră ƀơi Gia Lai ăt glăk đing nao pơtô hrăm glăi. Djop grup pơtô tui tơlơi hrăm amăng pơjing boh tơhnal, jơlan hơdră, pơkah ƀing čơđai kiăng pơtô hrăm brơi lăp djơ̆. Nai Đỗ Văn Hiếu, nai pơtô ƀơi sang hră gưl tlâo Đinh Tiên Hoàng, tơring glông Krông Pa brơi thâo:

“Kơ tơlơi hrăm, ƀing gơmơi pơkah ƀing čơđai, hluai tui rĭm čô mơnuih, đa thâo đa bŭ, sit biă ñu ƀing čơđai hrăm ƀu thâo, sang anŏ tơnap tap, ƀing gơmơi đing nao lu ƀiă, pơtô hrăm brơi lu ƀiă kiăng ƀing čơđai thâo ƀiă dong, hăng hơđong pran jua hlâo kơ hrơi pơplông”.

Nai Trịnh Văn Bình, Kơ-iăng khua sang hră gưl tlâo Đinh Tiên Hoàng brơi thâo, sang hră hơmâo pơphun pơtô hrăm brơi ƀing čơđai tui hơdră pơtô hrăm brơi klă hloh, črâo ba ngă hơdôm tơlơi pơplông lông lăng, kiăng ƀing čơđai đăo gơnang yak nao tal pơplông:

“Rơnuč blan 5, sang hră amra pơphun tal pơplông abih anih 12 ƀơi sang hră, sang hră amra hruă kjăp, lăi pơthâo tơlơi pơkă brơi ƀing čơđai hlâo kơ hrơi mut pơplông lông lăng. Gir run thun anai amra dưi ngă 98,5%. Bruă pơtô hrăm glăi sang hră hơmâo pơpha djơ̆ tơlơi čang rơmang mơng ƀing čơđai”.

Tal pơplông abih anih 12 thun anai, đơ đam tơring čar Gia Lai hơmâo rơbêh 15.200 čô čơđai čih anăn nao pơplông; amăng anun hơmâo giăm 14.300 čô čơđai hrăm gưl tlâo tui juăt, 483 čô čơđai hrăm rĭse, dŏ glăi lĕ ƀing nao pơplông mă hơjăn. Amăng abih tih mrô čơđai nao pơplông hơmâo rơbêh 14.000 čô čơđai čih anăn mut pơplông gưl prong, cao đẳng. Tơring čar Gia Lai hơmâo hơdră pơhlôm 41 mrô puang pơplông sit nik.

Amăng hrơi blan rơgao, Ding jum pơtô pơjuăt hơmâo hră pơtrun črâo ba hơdôm gơnong bruă pơtô pơjuăt, hơdôm boh sang hră-Ding jum ling tơhan kơ bruă pơphun pơplông abih anih 12 thun 2023, amăng anun lăi pơthâo hrơi mông pơphun amăng tal anai.

Tui anun, tal pơplông abih anih 12 thun 2023 hơmâo pơphun amăng hơdôm hrơi dong mơng lơ 27,28,29 hăng 30/6/2023, amăng anun, ƀing čơđai ngă hră pơ-ar nao pơplông amăng tlam lơ 27/6, pơplông dong lơ 29, 29 hăng 30/6 lĕ hrơi prap pơhrua. Hrơi mông pơplông rĭm tơlơi hrăm hơmâo ding jum prap lui tong ten tui anai: Lơ 28/6, mơguah pơplông tơlơi hrăm Ngữ Văn, yang hrơi tlam lĕ Toán; lơ 29/6, mơguah amra pơplông Khoa học tự nhiên hăng khoa học xã hội; yang hrơi tlam lĕ Ngoại ngữ.

Kơ akŏ bruă prap lui, pơphun tal pơplông abih anih 12 thun 2023, Ding jum pơtô pơjuăt rơkâo djop gơnong bruă pơtô pơjuăt git gai djop sang hră pel ĕp, lăi pơthâo tơlơi pơhing brơi ƀing čơđai glăk hrăm anih 12 hluai tui hră črâo ba mơng gơnong bruă, hơmâo wŏt tơlơi pơhing brơi ƀing čơđai hăng bruă lăi pơthâo puang čom mơng ƀing čơđai.

Tui tơlơi pơhing mơng Ding jum pơtô pơjuăt, truh 8 mông lơ 18/7, djop gơnong bruă pơtô pơjuăt, djop anom bruă čih anăn nao pơplông amra lăi pơthâo puang hrăm abih anih 12 thun 2023 hăng djop sang hră gưl tlâo kiăng ngă pơgiong bruă tŭ yap puang pơplông kaih hloh amăng lơ 20/7. Kaih hloh amăng lơ 24/7, ƀing čơđai hơmâo ngă brơi hră pơ-ar mă ƀăng jang jai, hră čom puang hăng djop hră pơ-ar tŭ yap bơdjơ̆ nao./.