Tal pơplông abih anih 12 thun 2023 him lăng ăt pơhlôm hơđong tui thun 2022, samơ̆ amăng tơlơi pơkă hơmâo sa, dua tơlơi phrâo kiăng ƀing čơđai pơđok tong ten. Hrŏm hăng bruă lăi pơthâo kiăng ƀing čơđai thâo tong ten tơlơi pơkă, djop sang hră ƀơi Gia Lai ăt glăk gir run amăng bruă pơtô hrăm. Djop grup pơtô hrăm hơmâo čih pơkra boh tơhnal, jơlan hơdră, kah pha ƀing čơđai kiăng hơmâo hơdră pơtô hrăm brơi lăp djơ̆.

Tal pơplông abih anih 12 dêh čar thun anai, đơ đam tơring čar Gia Lai hơmâo rơbêh 15.200 čô čơđai čih anăn nao pơplông; amăng anun hơmâo giăm 14.300 čô čơđai hrăm anih 12 tui juăt, hăng 483 čô mơnuih hră gưl III rĭse, dŏ glăi lĕ ƀing nao pơplông pơkŏn. Amăng mrô čơđai čih anăn nao pơplông hơmâo rơbêh 14.000 čô čơđai čih anăn mut hrăm gưl prong, cao đẳng. Tơring čar Gia Lai hơmâo hơdră hăng 41 puang pơplông sit nik.