Amăng anih hơkrŭ glăi drơi jăn mơ̆ng Sang ia jrao pơjrao tơlơi ruă čơđai muai Gia Lai, amai Trần Khánh Huyền (dô̆ pơ̆ plơi prong Ayun Pa, Gia Lai) tơguan ană đah rơkơi 10 blan hơkrŭ hơdor glăi tơdơi kơ breh pơjrao uk rơkông đok. Ƀô̆ mơta ñu ƀuh mơ-ak biă tơdơi kơ hơdôm hrơi blan tơnap tap hrŏm hăng ană. Amai Huyền brơi thâo, mơ̆ng hrơi tơkeng rai, ñu bưp lu laih tơlơi tơnap yua kơ ƀu klă amăng drơi jăn anai, kah hăng juăt tơglăk ia tơsâo, bơbrah amăng tơngia, ngă tơlơi suaih pral tơdu hăng kaih prong. Bưng mơn thâo truh jơlan hơdră Breh pơjrao brơi đôč, ñu lăi pơthâo hăng dưi gum djru. Mơ̆ng prăk nao rai, pel ĕp truh kơ breh pơjrao, abih bang leng kơ dưi djru brơi đôc hăng bơwih brơi tŏng ten dong:

“Lơm nao pel ĕp, ƀing ơi nai ia jrao mă bruă abih pran jua biă. Arăng pơtô brơi abih bang, dô̆ djru brơi dong prăk ia xăng. Ră anai breh pơjrao, hăng sa čô amĭ, kâo hơđong pran jua hloh pioh ană pô dưi brô̆ prong klă kah hăng ƀing čơđai pơkon; bơbrah tơngia sit ñu lĕ ăt amra plai ƀiă mơn bơhmu hăng hlâo kơ breh pơjrao”.

Ƀơi kual dô̆ tơguan, ama ană ayong Phùng Theo Sáng, djuai ania Mông, ƀơi plơi Quảng Hòa, tơring glông Dak Glong, tơring čar Dak Nông, ăt ƀuh hyơ hyor pran jua mơn ƀơi anăp bruă breh pơjrao kơ ană kơƀah tơƀông. Ayong Sáng brơi thâo, ană ñu 16 thun hăng amăng 16 thun rơgao, ñu dô̆ čang rơmang na nao dưi breh pơjrao brơi kơ ană pô, samơ̆ ƀu dưi ngă ôh yua kơ sang anô̆ tơnap tap. Ñu čang rơmang tơdơi kơ breh pơjrao, ană pô amra dưi pơhiăp, ƀong huă kah hăng arăng pioh phing kơ pran amăng bruă pơhiăp hăng arăng.

“Jơlan hơdră anai klă biă yua kơ hmâo pran jua đăo kơnang kơ ơi nai ia jrao breh pơjrao brơi. Ƀing gơmơi rai pơ̆ anai čang rơmang lĕ jơlan hơdră breh pơjrao brơi kơ ƀing čơđai dưi ƀong mơñum, amuñ pơhiăp, kiăng tơdơi anai ñu hmâo sang anô̆ dong”.

Anai lĕ tal 2 jơlan hơdră Breh pơjrao brơi čơđai kơƀah tơƀông, sa bruă mă gum djru yua kơ Khul Operation Smile Việt Nam gum hrŏm hăng Sang ia jrao čơđai muai Gia Lai pơphun ƀơi tơring čar Gia Lai. Thun hlâo, jơlan hơdră hmâo laih 104 čô čơđai anet dưi breh pơjrao truh kih. Jơlan hơdră thun anai pơphun pel ĕp brơi năng ai ñu 200 čô čơđai hăng pơphun breh pơjrao brơi năng ai ñu 100 čô čơđai ƀu klă drơi jăn mơ̆ng muai kơƀah tơƀông akă dưi breh pơjrao; anô̆ pioh glăi ƀu klă mơ̆ng muai, kah hăng thâo thol ƀơi ƀuai, uk rơkông đok, ƀah adung, ƀoh tơgơi, rơbêh čơđeng tơngan, kơđeng tơkai tơngan pơtir,  ƀơi tơring čar Gia Lai hăng sa dua bôh tơring čar jum dar. Hơdôm mơnuih ƀu klă drơi jăn dưi breh pơjrao hmâo pel ĕp, pơjrao hăng breh ƀư̆ pơkra brơi đôč, hrŏm hăng anun dưi djru hơdôm prăk nao rai, ƀong huă, dô̆ glăi. Thạc sĩ, Ơi ia jrao Bạch Minh Tiến, Khua Anom breh pơjrao ƀư̆ pơkra drơi jăn hăng pơkra kiăng kơ hiam, Sang ia jrao giăng mah Việt Nam hăng Cuba, Khua Grŭp brơi thâo:

“Ƀing gơmơi hmâo mơnuih breh pơjrao wai lăng mơnuih ruă, ƀing ơi nai ia jrao pơjrao tơlơi ruă čơđai hăng ƀing mơnuih gum djru rai mơ̆ng Hà Nội, ƀôn prong Hồ Chí Minh, Nghệ An hăng Huế djop mơnuih hur har pran jua biă, ƀing gơmơi ăt prăp lui mơn mrô ia jrao, gơnam tam mă yua kiăng pơhlôm brơi ƀing čơđai dưi pơjrao djop klă hloh gah bruă ia jrao hăng čang rơmang ba glăi tơlơi mơ-ak kơ ƀing čơđai”.

Gah Sang ia jrao čơđai muai Gia Lai, yă Từ Thị Mai Linh, Kơ-iăng Khua Sang ia jrao brơi thâo, sang ia jrao gir run na nao pơjing tơlơi gal klă hloh, kơ mơnuih ruă, sang anô̆ mơnuih ruă pioh tal breh pơjrao anai dưi ngă truh kih pơhlôm:

“Mrô ƀing čơđai rai pơ̆ sang ia jrao lu biă, grŭp ăt hmâo mơ̆n kơčăo bruă ngă hluh gah, mă bruă mơmot hăng kơtưn gum hrŏm kơplah wah sang ia jrao čơđai muai hăng grŭp kiăng mă bruă klă hloh hăng pơhlôm hloh”.

Bruă ngă tui jơlan hơdră hmâo bôh tŭ yua ană mơnuih dơlăm, pơdah tơlơi lăng ba mơ̆ng khul mơnuih hăng mơnuih mơnam pioh kơ čơđai muai, čơđai ƀu klă drơi jăn hmâo tơlơi hơdip tơnap dưi tŭ mă hơdôm bruă gum djru tâ̆o klă. Jơlan hơdră hmâo ba glăi laih tơlơi pĕ klao, phing kơ pran jua kơ čơđai ƀuphă, pioh ƀing čơđai pơwot glăi hăng mơnuih klă drơi jăn, hmâo tơhnal hrăm hră, ngui ngor hăng brô̆ prong kah hăng ƀing gơyut hnưr ha thun, djru ƀing čơđai hmâo tơlơi pơgi kơdih klă hiam hloh. Jơlan hơdră breh pơjrao ƀu kơnong kơ djru ƀing čơđai hơkrŭ glăi drơi jăn, ĕp glăi tơlơi pĕ klao ôh mơ̆ ñu dô̆ djru ƀing ơi nai ia jrao ƀơi plơi pla pơđĭ dlông ngă bruă, tŭ mă hơdôm hơdră phrâo mơ̆ng ƀing juăt bruă ia jrao./.