Khua pơ ala mơnuih ƀôn sang Việt Nam lăng yom hơdôm tơlơi djru mơ̆ng Khua anih jưh pơ ala dêh čar Prang ƀơi Việt Nam, Olivier Brochet pơtrut tơlơi rô nao rai ngă giăng mah yom phara plah wah Việt Nam hăng Prang, amăng anun tơlơi ngă giăng mah dua bơnah anom bruă pơ ala mơnuih ƀôn sang Việt Nam hăng Prang.

Khua pơ ala mơnuih ƀôn sang dêh čar ta lăi, tơlơi giăng mah Việt Nam-Prang hơmâo lu tơlơi gêh găl pơtrut pơđĭ kyar kơtang hloh, biă mă ñu tơdơi kơ dua bơnah pơđĭ tui rơnoh ngă giăng mah hlom bom. Anom bruă pơ ala mơnuih ƀôn sang Việt Nam čang rơmang gah dêh čar Prang, kơtưn brơi khul khua mua pơblih nao rai čuă jơmư trư găn kah pơpha nao rai tơlơi thâo thăi amăng bruă mă. Ơi Trần Thanh Mẫn, Khua pơ ala mơnuih ƀôn sang Việt Nam rơkâo kơ Khua anih jưh pơ ala, Olivier Brochet ăt jing pô pơtruh nao rai, djru pơtrut tơlơi ngă giăng mah hiam mơak plah wah Việt Nam hăng Prang, jai hrơi tong ten tŭ yua hloh. Khua anih jưh pơ ala dêh čar Prang ƀơi Việt Nam, Olivier Brochet lăi pơtong, ăt amra djru hrŏm đôč amăng bruă kơtưn bruă ngă giăng mah pŭ ƀăn hăng gum nao rai dua bơnah dêh čar, biă mă ñu amăng bruă khua pơ ala mơnuih ƀôn sang.