Hăng anăp ngă bruă “Giăm ană plơi, jĕ ană plơi hăng djă tơngan pơčrao brơi bruă či ngă”, tơring čar Lâm Đồng hơmâo akŏ pơjing 2.765 grup hyu mă bruă pơtô ba ia rơgơi mrô ƀơi djop plơi pla, ƀôn lan giăm 16.800 čô ding kơna djru brơi mơnuih ƀôn sang thâo ba yua ia rơgơi mrô.

Bruă mă pơtô ba hơdră yua ia rơgơi mrô hơmâo pok pơhai sa amăng plĕ; abih bang khua mua, mơnuih apăn bruă čar lêng kơ hơmâo hrăm soh. Hrŏm hăng anun pơtô ba ƀơi anăp, lu jơlan hơdră pơtô ba amăng online, pơdah brơi amăng telephon rơgơi, pơhưč lu mơnuih ĕp lăng hăng hrăm tui. Tui hăng Gơnong bruă Kơsem min boh thâo ia rơgơi phrâo tơring čar Lâm Đồng, lu să, plơi pla amăng tơring čar triăng biă akŏ pơdong, pok pơhai bruă mă tui hluai hơbô̆ bruă hiam klă, djơ̆ găl, thâo pơčeh phrâo ba glăi boh tŭ yua pơblih yua mrô.