Pơhiăp ƀơi mông ngă bruă, Khua git gai Ping gah ơi Tô Lâm pơsit, hăng bruă ngă Khua git gai Ping gah, ơi Nguyễn Văn Linh pơphun jơlan hơdră pơplih phrâo kơtang biă, pơsir hĭ tơlơi pơgăn mơ̆ng tơlơi phiăn, pơkra gơnam lu hloh, pok prong tơlơi dưi ngă pô mơ̆ng hơdôm anom bơwih ƀong, ngă lăng hlâo hăng tơdơi kơ anun hơkrŭ kjăp tui djŏp tơlơi bơwih ƀong gah rơngiao kơnuk kơna akŏ pơdong, čih pơkra tơlơi phiăn anih sĭ mơdrô hơmâo Kơnuk kơna wai lăng, pok prong bruă pơtom hiăp hăng čar rơngiao, mut hrŏm jar kmar.

Lăi dlăm, amăng hrơi mông abih bang djuai ania ta glăk ha pran jua ngă truh kih Tơlơi pơtrun Jơnum ping gah dêh čar tal 13, dêh čar ta mă bruă tui hơbô̆ bruă gong gai dua gưl hăng anih đĭ kyar phrâo, Khua git gai Ping gah ơi Tô Lâm kiăng hăng čang rơmang abih bang anom bruă čar jai hrơi râu mơdưh pran jua Nguyễn Văn Linh - pran jua pơplih phrâo, ngă bruă khut khăt, djơ̆ hơdră, jê̆ giăm mơnuih ƀôn sang hăng pran jua kjăp khŏp kiăp tui jơlan đĭ kyar bơwih ƀong huă xã hội chủ nghiã, samơ̆ ăt pơplih hơdeč hmar, djơ̆ hăng tơlơi hơmâo phrâo, tui rơnuk boh thâo ia rơgơi phrâo, prăk kăk tuh pơ alin amăng bruă djă rơgoh, pơplih boh thâo mrô, bơwih ƀong mrô, bơwih ƀong pơdar nao rai; ba lŏn ia ta mut hrŏm dlăm hloh laih anun kơđi čar rŏng lŏn tơnah, dêh čar bơwih ƀong gưl jar kmar hăng tơlơi thâo rơgơi gru grua mơnuih ƀôn sang hmư̆ hing, kiăng dưi nao mring hăng hơdôm boh dêh čar pơdrong sah ƀơi djŏp kual lŏn.