Jơnum pơčrông sai hăng tơlơi mut hrŏm mơng khua mua hơdôm Anom bruă, ding jum, sang bruă, sang hră, ƀon lan hơmâo kual ia rơsĭ pơphun amăng hrơi blan Kơnuk kơna phrâo hơmâo tơlơi pơtrun mrô 218 kơ jơlan hơdră bruă mă ngă tui tơlơi pơtrun mrô 20 mơng Khul apăn bruă Ping gah tal XIV kơ pơjing, pơđĭ kyar Việt Nam jing dêh čar hơmâo kual ia rơsĭ kơtang. Boh thâo phrâo, boh thâo măi mok, pơplih pơčeh phrâo hăng pơplih mrô ƀu djơ̆ kơnong pơsit tong tơlơi gơgrong djru ba đôč ôh mơ̆ ăt pơsit lĕ sa amăng hơdôm tơlơi atur phun kiăng hrưn đĭ klă bruă mă mơng dêh čar hơmâo ia rơsĭ.

Ơi Trần Tuấn Anh, kơ-iăng khua sang hră boh thâo phrâo hăng boh thâo ia rơgơi Việt Nam brơi thâo, sa boh dêh čar hơmâo kual ia rơsĭ kơtang ƀu djơ̆ kơnong hơmâo lu tơdrun kompăn, ƀattô ƀudah pok prong bơwih ƀong kual ia rơsĭ prong đôč ôh mơ̆ kiăng hluh rơđah, đăo lăng hlâo hăng wai lăng kual ia rơsĭ, mă yua hơđong kjăp kông ngăn hăng ngă pô kơ mă yua boh thâo phrâo amăng kual ia rơsĭ. “Kiăng pơjing bruă pơlir kơsem min kual ia rơsĭ dêh čar brơi sit nik, sa boh dêh čar kual ia rơsĭ kơtang ƀu djơ̆ kơnong gơnang nao sa anom bruă kơsem min ƀudah sa Ding jum, gơnong bruă. Bruă pơlir kơsem min kual ia rơsĭ hơmâo tơlơi mut hrŏm mơng hơdôm anom bruă kơsem min, hơdôm boh sang hră gưl prong, djop ding jum, gơnong bruă wai lăng kơnuk kơna, ƀing mơnuih ngă bruă amăng ia rơsĭ, hơdôm boh ƀon lan ter hang ia rơsĭ, hơdôm anom bruă bơwih ƀong amăng kual ia rơsĭ hăng bơnah ngă hrŏm”.

Anai lĕ ƀon lan hơmâo tơlơi dưi yôm phăn kơ kual ia rơsĭ hơmâo giăm 490 km hang ia rơsĭ, rơbêh 200 boh bul pơtâo, hơdôm kual tong wing dơlăm Vân Phong, Nha Trang, Cam Ranh hăng bul pơtâo Trường Sa, hrŏm hăng hơdôm anih kơsem min, pơtô pơjuăt dơlăm tui. Ơi Nguyễn Thanh Hà, kơ-iăng khua jơnum min mơnuih ƀôn sang tơring čar Khánh Hòa brơi thâo, ngă tui tơlơi pơtrun mrô 20 rơkâo pơplih kơtang mơng mă yua ia rơsĭ hơdai nao wai lăng kual ia rơsĭ tui rơnuk phrâo, hluai tui tơlơi thâo thăi hăng boh thâo phrâo. Khánh Hòa rơkâo gơnong glông đing nao tuh pơ alin hơdôm anih anom kơsem min yua hrŏm gưl dêh čar anun lĕ ƀattô kơsem min kual ia rơsĭ dơlăm; anih kơsem min akŏ phun, anih anom krăo lăng rơgơi; laih dong sem lăng kơ bruă ba anom bruă kơsem min gưl dêh čar kơ boh thâo phrâo kual ia rơsĭ ƀơi Khánh Hòa amăng dưm dăp hơdôm anih anom, anih kơsem min akŏ phun deh čar kơ boh thâo phrâo akŏ phun. “Tơring čar Khánh Hòa ƀuăn pioh ngăn rơnoh mă yua lu hloh, prap lui lŏn mơnai, tơhnal pơkă, anih anom jơlan glông kah hăng gum hrŏm kjăp phik hăng hơdôm anom bruă, sang hră amăng tơring čar kiăng čơkă mă, pok pơhai tŭ yua hơdôm akŏ bruă kơsem min, jao mă yua boh thâo phrâo.”

Khua ding jum boh thâo phrâo hăng boh thâo ia rơgơi Vũ Hải Quân pơsit tong, tơlơi pơtrun mrô 20 ba glăi tơlơi pơplih tong ten hăng bruă boh thâo phrâo, boh thâo măi mok kual ia rơsĭ. Ding jum boh thâo phrâo hăng boh thâo ia rơgơi amra pơphô bruă brơi kơnuk kơna akŏ bruă pok pơhai tơlơi pơtrun mrô 20, đing nao ruah mă hơdôm bruă jao yua boh thâo phrâo, boh thâo ia rơgơi, pơplih pơčeh phrâo hăng pơplih mrô kual ia rơsĭ phun rơwang thun 2026-2030. “Ding jum boh thâo phrâo-boh thâo ia rơgơi amra pơphô bruă brơi kơnuk kơna tong ten akŏ bruă pok pơhai tơlơi pơtrun mrô 20. Anai lĕ bruă ba glăi tŭ yua, hơmâo lu bruă amăng kual ia rơsĭ, anŏ ngă pơsur tui anun lơm yua boh thâo phrâo, tơlơi anai amra ngă pok prong. Ding jum boh thâo phrâo, boh thâo ia rơgơi amra gir run dưm dăp mơng tơlơi akŏ phun kiăng dưi pok pơhai brơi tŭ yua. Đa hơmâo tơlơi ƀing ta kiăng ngă sui pơ anăp, ngă brơi klă samơ̆ đa hơmâo bruă mơn tuh pơ alin ba glăi tŭ yua hlao”./.