Anai lĕ tal nao čuă gưl kơnuk kơna blung a pơ dêh čar Nga mơng Khua apăn akŏ Ping gah, Kơnuk kơna dong mơng thun 1991, pơphun tơdơi kơ Jơnum tal XIV mơng Ping gah hăng tal plĕ hră ruah Khua pơ ala mơnuih ƀon sang dêh čar tal XVI. Thun 2025, rơnoh pơhrui mơng sĭ mơdrô kơplah wah Việt Nam-Nga giăm 4,8 klai đôlar Mi; 5 blan akŏ thun truh 2,16 klai đôlar Mi, đĭ 6,4% pơhmu tui tơđar thun hlâo. Yap truh blan 7, dêh čar Nga hơmâo 223 akŏ bruă tuh pơ alin ƀơi Việt Nam, abih tih prăk tuh pơ alin giăm 1 klai đôlar Mi; Việt Nam hơmâo 19 akŏ bruă ƀơi Nga, abih tih prăk tuh pơ alin 1,64 klai đôlar Mi.

Dua boh dêh čar glăk pơtrut kơtang ngă hrŏm amăng bruă ling tơhan-wai pơgang rơnuk rơnua, apui lơtrik, boh thâo ia rơgơi, pơtô pơjuăt, gru grua hăng tuai čuă ngui; amăng anun hơmâo akŏ bruă anih kơsem min boh thâo ia rơgơi hăng boh thâo yua put ayuh. Tal nao čuă anai pơgôp ngă tong ten amăng jơlan gah pơtom hiăp phara, ngă pô, djop bơnah, djop mơta mơng Việt Nam, yua kơ tơlơi dưi mơng mơnuih ƀôn sang dua bơnah, yua kơ tơlơi rơnuk rơnua hăng pơđĭ kyar. Tal nao čuă anai čang rơmang ba glăi tơlơi pơplih phrâo, pơtrut tơlơi rô nao rai ngă hrŏm yôm phăn djop mơta Việt Nam-Nga jai pơđĭ kyar kơtang, sit nik hăng hơđong kjăp; laih dong ngă dơlăm tui pran đăo gơnang yôm phăn hăng tơlơi rô nao rai giang mah gru grua kơplah wah dua boh dêh čar./.