Mơguah sing bring ƀơi plơi Tơ Drăh, să Bờ Ngoong, tơring čar Gia Lai, ƀing kông ang să hơmâo nao čuă jơmư sang anŏ ơi Bái, 43 thun, mơnuih djuai ania Bahnar, tơña bla bruă ngă hmua, tơlơi suaih pral hăng bruă hrăm hră kơ ană bă. Rơbêh ha thun hlâo anun, ơi Bái hơmâo lê̆ lung hmư̆ tui tơlơi đăo “Ba Na Đêga Kon Kông” yua đuăi hyu dŏ pơ tač rơngiao akŏ pơjing kiăng kơ jak iâu mơnuih ƀôn sang mut hrŏm.

Ơi Bái bơră ruai glăi, lơm hrơi phrâo ƀuh, ƀing pô anai pơtô pơblang anai lĕ “tơlơi đăo brơi mơnuih Bahnar”, hơmâo tŭ yap yua anun lu mơnuih đăo gơnang kiăo tui. Truh hrơi  hơmâo gong gai ƀon lan hăng tơhan kông ang pơblang brơi, pơƀuh brơi tong ten bruă ngă soh, hluai tui tơlơi đăo kiăng pơčut ngă soh mơng ƀing ngă akŏ, anun ñu kah mơng thâo arăng plư ngă tui: “Tơlơi đăo Ba Na Kon Kông lĕ tơlơi đăo ƀu hiam ôh. Anŏ ƀu hiam ƀơi anai ngă pơčlah djuai ania, Kơnuk kơna ƀu brơi kiăo tui ôh. Lơm kâo thâo tui anun, kâo lui kiăo tui. Mơnuih djuai ania Bahnar hăng Jarai ƀơi kual anai hơmâo kơnuk kơna đing nao djru brơi lu biă mă, duam ruă hơmâo hră pơhlôm nua ia jrao”.

Tui anom bruă kông ang, mơng blan 7 truh blan 9 thun 2025, tơlơi đăo “Ba Na Đêga Kon Kông” hơmâo rơbêh 350 čô mơnuih ƀơi 22 boh plơi pla amăng 7 boh să ƀơi tơring čar Gia Lai mut hrŏm. Lơm pel ĕp pơsit tong, ƀing iâu tui tơlơi đăo anai akŏ pơjing bruă mă kjăp, hơgŏm gah tlôn tơlơi đăo kiăng pơtô pơblang tơlơi pơmĭn ngă pơčlah, pơčut pơčao ngă pơčlah djuai ania, kơdong glăi gong gai hăng pơtrut pơsur pơgôp prăk ča čot kiăng djru brơi bruă ngă sat.

Thượng tá Phan Thanh Hải, kơ-iăng Khua anom pơgang rơnuk rơnua dêh čar, kông ang tơring čar Gia Lai brơi thâo, sit biă ñu “Ba Na Đêga Kon Kông” lĕ tơlơi đăo plih mă mơng “Tin Lành Đêga” yua ƀing tui Fulrô dŏ pơ tač rơngiao djru brơi, git gai kiăng ngă rung răng amăng ƀon lan. Amăng hrơi tơjuh tong krah blan 5/2026, kông ang tơring čar Gia Lai hơmâo ƀom kiơng kiăng pel ĕp bruă “Phă pơrai hơdră gum pơgôp”, mă pơkŏng sa, dua čô mơnuih ngă akŏ amăng tơlơi đăo anai. “Ƀing pô anai plư kiăo tui hăng pơđĭ kyar lu mơnuih amăng kual mơnuih djuai ania ƀiă kiăng pơjing ƀing mơnuih pơmĭn kơdong glăi, phă pơrai gong gai, laih dong pơčut pơčao, mă tơlơi pơhing mơ-it brơi ƀing dŏ hơdip pơ tač rơngiao, kiăng lăi pơthâo brơi bruă ngă sat amăng mơnuih mơnam hăng tơlơi hơdip kơ mơnuih ƀôn sang, lăng anai lĕ tơlơi ngă soh kiăng jăm ƀuah dêh čar Việt Nam ngă soh hăng tơlơi dưi ngă pô, mơng anun ngă tơdu kơdrưh ang hăng tơlơi đăo gơnang nao lŏn ia ta”.

Amăng thun blan bơkơdong glăi, tơring čar hơmâo gir run pơsir hĭ khut khăt  ƀing ngă akŏ. Hrŏm hăng anun, bruă pơtô pơblang, pơtrut pơsur, iâu glăi ƀing kiăo tui hlâo anun ăt hơmâo đing nao biă mă kiăng mơnuih ƀôn sang pơwot glăi tui tơlơi đăo hơđăp, djơ̆ tơlơi pơkă amăng tơlơi phiăn. Amăng hơdôm boh plơi pla, ƀing tha plơi, mơnuih arăng đăo gơnang, khua git gai Ping gah, Khua plơi jing ƀing mơnuih phun amăng bruă pơtô pơblang, pơtrut pơsur neh met wa thâo rơđah hơdôm tơlơi plư pleč mơng ƀing sat hluai tui tơlơi đăo. Ơi Đinh Chroh, Khua git gai Ping gah ngă rah Khua plơi Tơ Drăh, să Bờ Ngoong brơi thâo: “Kâo pơblang brơi neh met wa thâo Việt Nam hơmâo 54 djuai ania. Ƀu dưi pơčlah mơnuih djuai ania Bahnar, Jarai ƀudah Yuăn tui tơlơi đăo phara, ngă soh glăi hăng pran gum pơgôp djuai ania”.

Đại tá Phạm Hữu Trường, kơ-iăng Khua kông ang tơring čar Gia Lai brơi thâo, bruă kơdong glăi hơdôm bruă hluai tui tơlơi đăo kiăng ngă rung răng lêng kơ hơmâo Ping gah, kông ang tơring čar pơsit lĕ bruă jao akŏ phun amăng bruă wai pơgang rơnuk rơnua lŏn ia, pơhlôm hơđong amăng tơring čar. Rơngiao kơ hơdôm bruă jao kiăng pơgăn tañ, mơng ataih bruă akŏ pơjing khul grup, pơđĭ kyar mơnuih hyu pơanur mơnuih ƀôn sang, tơhan kông ang ăt pơtrut kơtang bruă pơtô pơblang brơi, ngă tui pran gơgrong mơng ƀing tha plơi, mơnuih arăng đăo gơnang hăng ƀing hlâo anun ngă soh samơ̆ anai pơwot glăi laih. “Kơdong glăi, pơsir hĭ khut khăt kiăng hơdôm bruă hơkrŭ glăi Fulro, Tin Lành Đêga pơanăn mă Ba Na Đêga Kon Kông hơmâo pơgôp ngă hơđong, pơhlôm rơnuk rơnua amăng ƀon lan. Sit biă ñu, mơng hơdôm bruă mă, dưi iâu glăi ƀing akŏ kiăng jing ƀing mơnuih gir kơtir amăng bruă wai pơgang rơnuk rơnua, pơtrut pơsur lu mơnuih pơwot glăi tui hơdôm tơlơi đăo hiam”.

Bruă bơkơdong glăi hăng hơdôm khul grup hluai tui hơdôm bruă djuai ania, tơlơi đăo kiăng ngă rung răng ƀơi kual Dap kơdư lăi hrŏm hăng tơring čar Gia Lai hnun mơn hơmâo pơsit lĕ bruă sui thun, tơnap tap. Yua ƀing ngă soh lêng kơ ĕp lu jơlan ngă bruă, hơneč mă yua ƀu thâo phe pho mơng mơnuih ƀôn sang anun pơtrut ngă pơčlah, ngă pơrai pran gum pơgôp djuai ania.

Samơ̆, hăng hơdôm bruă mă khut khăt mơng anom bruă bơdjơ̆ nao, hrŏm hăng tơlơi mut hrŏm mơng gưl Ping gah, gong gai ƀon lan hăng mơnuih ƀôn sang, hơdôm tơlơi pơčut pơčao ngă soh, hơgŏm gah tlôn tơlơi đăo amra ƀu dŏ dong tah; tơlơi rơnuk rơnua amra tŏ tui pơhlôm kjăp ƀơi kual Dap kơdư./.