Sang anô̆ ơi K’Phân, mơnuih ping gah ƀơi thôn 3, să Đinh Trang Thượng, tơring glông Di Linh lĕ sa amăng hơdôm bôh sang anô̆ ba jơlan hlâo ngă đang kơphê klă hiam. Hăng 3 ektar đang kơphê, bơyan phrâo rơgao djru sang anô̆ ñu pơhrui hmâo 17 tơn kơphê, ba glăi prăk pơhrui glăi ha klai prăk. Ƀu kơnong kơ thâo ngă pơdrŏng kơ ha jăn pô đôč ôh, K’Phân dô̆ djru klă neh wa amăng plơi pla glăi phun kơphê ƀơi đang kơphê tha sui thun, pơtô brơi pơplih pơkra glăi pơjeh pla phrâo pioh hmâo lu bôh hăng klă hiam dong.

“Kơphê tha sui thun hmâo ƀiă bôh, khom gep than pioh pơplih klă đang phun pla. Kơphê gep khom djop ia pruih, kơmok pruai phrâo bluh đĭ ñu mơ̆ng klă. Amăng anun, pruih ia ƀiă biă ñu 3 wot, kơmok pruai 4 wot, pruih jrao 2 wot amăng sa thun lĕ kơphê mơ̆ng hmâo lu bôh. Mơ̆ng hrơi gep than pơjeh phrâo rim thun hơnong ñu pơhrui hmâo truh kơ 15 tơn”.

Hăng hơdră ngă đang hmua lăp djơ̆, amăng anun djop phun pla hmâo nua yôm kah hăng kơphê, sầu riêng, bôh kruăi dung, pla phun kơbua rông hlăt mă suaih ñu... nua gơnam ngă rai ƀơi Đinh Trang Thượng ƀu pơdơi pơđĭ tui. Thun 2024 hơnong ñu rim ektar lŏn ngă đang hmua ƀơi anai pơhrui hmâo 125 klăk prăk, hơnong ñu sa akô̆ mơnuih hmâo 47 klăk prăk, hmâo 104% kơčăo bruă tui tơlơi pơtrun pơsit Ping gah să ba tơbiă.

Tui hăng ơi K’Đức, Khua git gai Ping gah thôn 2, să Đinh Trang Trượng, sa amăng hơdôm bôh than yôm phăn djru să hmâo yak pơđĭ kyar kơtang kơjăp amăng hơdôm hrơi rơgao jing bruă ba gru hlâo mơ̆ng mơnuih ping gah. Đơ đam plơi hmâo rơbêh kơ 200 bôh sang anô̆, amăng anun hmâo 17 čô mơnuih ping gah leng kơ ba gru hlâo amăng bruă pơđĭ kyar bơwih ƀong.

“Ngă tui tơlơi črâo ba mơ̆ng Ping gah gưl dlông, Grŭp Ping gah rŭ đĭ kơtang bruă pok pơhai gep than kơphê, ƀing mơnuih ping gah amăng plơi ba gru hlâo, ngă tui bruă ba jơlan hlâo amăng ngă tui hăng ba glăi bôh tơhnal klă biă, tơlơi hơdip mơda neh wa dưi pơđĭ dlông, hmâo tơlơi gal pioh bơwih brơi kơ ană amôn hrăm hră truh kih. Rơngiao kơ gep than kơphê, ră anai neh wa amăng plơi dô̆ ngă tui bruă pla plah nao rai lu djuai phun pla kah hăng, ƀơr, sầu riêng, mắc ca, mơ̆ng anun bôh tơhnal bruă ngă đang hmua jai hrơi jai pơđĭ dlông”.

Ơi K’Đô, Kơ-iăng Khua git gai Ping gah, Khua Jơnum min mơnuih ƀôn sang să Đinh Trang Thượng brơi thâo, mơ̆ng hrơi kơphê trun nua, să hmâo mă yua tơlơi pơtrun pơsit tui akô̆ bruă pơplih phun pla, pơsur pơlar djuai pơjeh phun pla hmâo lu bôh hmâo nua. Biă ñu, bruă mă mơ̆ng mơnuih ping gah yôm phăn biă amăng lăi pơhing, pơtô ba neh wa mă yua bôh thâo phrâo hơdră măi mok ngă đang hmua. Amăng thun 2025 anai, hrŏm hăng rŭ đĭ kơtang hơdôm jơlan hơdră pơđĭ kyar bruă ngă đang hmua tui jơlan gah kơjăp phik, să pơsur pơđĭ kyar hơdră pla kơphê hơdjă pioh đĭ tui anô̆ klă hiam ñu, gum hrŏm hăng hơdôm anom bơwih ƀong pơhrui gơnam pioh pơhlôm anih sĭ hyu hơđong kơ mơnuih ngă đang hmua. Hrưn đĭ hrŏ trun mrô sang anô̆ ƀun rin 2% hăng pơđĭ prăk pơhrui glăi hơnong ñu sa akô̆ mơnuih hmâo 55 klăk prăk. Ơi K’Đô, brơi thâo:

“Găh yŭ tơlơi črâo ba ƀơi anăp mơ̆ng Ping gah hăng tơlơi gum tơngan hrŏm amăng abih bang bruă kơđi čar lu mơnuih ping gah hmâo ba gru hlâo laih amăng bruă pơđĭ kyar bơwih ƀong huă. Mơ̆ng anun mơnuih ƀôn sang ƀơi anai hrăm tui, djru pơtrut bơwih ƀong – mơnuih mơnam hrŏm mơ̆ng plơi pla. Đinh Trang Thượng ăt pơsur klă mơn mơnuih ƀôn sang amăng bruă lŏm lui sang tơ̆i, amăng thun 2024 hmâo lŏm lui 16 bôh sang tơ̆i. Amăng thun 2025 anai amra lŏm lui dong 18 bôh sang tơ̆i, ƀing gơmơi hrưn đĭ ngă giong hlâo kơ jơnum ping gah, amăng blan 5/2025 khom ngă giong”.

Hăng hơdôm jơlan gah pơsit lăp djơ̆, tơlơi gum pran hrŏm mơ̆ng ping gah, gong gai hăng mơnuih ƀôn sang, Đinh Trang Thượng glăk amăng ƀrư̆ hrưn đĭ, jing sa amăng hơdôm bôh să plơi pla phrâo ngă gru hlâo mơ̆ng tơring glông Di Linh. Ră anai să Đinh Trang Thượng glăk ngă tui dong bruă mơ̆ng mơnuih ping gah, kơtưn pơtô glăi bôh thâo phrâo măi mok, pơtrut kơtang bruă ngă đang hmua tui jơlan gah kơjăp phik, djru pơdŏng hơdôm bôh plơi pla jai hrơi jai pơplih phrâo, hrưn đĭ pơjing klă hloh pioh čơkă mơ-ak Jơnum đơ đam dêh čar tal XIV mơ̆ng Ping gah./.