Ngă lơphet čơkă jum pơphun prong biă mă ƀơi sang bruă khua pơ ala mơnuih ƀôn sang dêh čar Australia, ruăi sang dlông ƀơi kơdư čư̆ Capital plơi prong jưh jom Canberra dêh čar Australia, tui hơdră ngă lơphet kơdrưh ang prong biă mă pioh kơ khua apăn akŏ kơnuk kơna dêh čar pơkŏn nao čuă dêh čar Australia. Amăng mông mơak jĕ giăm ngă giăng mah, Khua dêh čar ơi Anthony Albanese, jak iâu ơi Phạm Minh Chính đĭ nao rơbat kơtuai anih lăng akhăn sut hiam kơdrưh amăng mông anun arăng pơnah 19 asar phao kơnông hmư̆ tơ-ua jua kơtang amăng kơdư Capital. Hla gru Việt Nam hơdui đĭ čơkă Khua dêh čar ơi Phạm Minh Chính  hăng bơnai ñu laih anun grup khua mua mơ̆ng Việt Nam. Giong ngă lơphet čơkă, dua čô khua pơphun bơkơtuai mơtam. Khua dêh čar Australia hăng Khua dêh čar Việt Nam dŏ lăng pơsit bruă kĭ pơkôl hơdôm pok hră ngă hrŏm; laih dơ̆ng bưp ƀing čih tơlơi pơhing phrâo lăi pơthâo boh tơhnal dua bơnah hơmâo tŭ ư hrŏm amăng mông bơkơtuai, amăng anun pôr pơthâo bruă akŏ pơjing Tơlơi ngă giăng mah bơnah ngă hrŏm yôm phara hlom bom hloh plah wah Việt Nam-Australia.

Amăng 2 hrơi nao pơhmư̆ Jơnum gưl dlông pha ra hơdor glăi 50 thun tơlơi rô nao rai ASEAN – Australia, Khua dêh čar ta Phạm Minh Chính hmâo pioh laih mông pơbưp abih bang Khua mua gưl dlông hơdôm bôh dêh čar kual ASEAN, Australia, New Zealand hăng Khua čih pioh gah ASEAN. Amăng mông pơbưp, Khua dêh čar ta bơni tơlơi gum hrŏm, djru ba, lăi pơthâo tơlơi găn rơgao mơ̆ng hơdôm bôh dêh čar amăng hơkrŭ glăi hăng pơđĭ kyar bơwih ƀong; pơdah pran jua čang rơmang pơtrut gum hrŏm amăng hơdôm bruă yôm phăn mơ̆ng ASEAN hăng tơlơi rô nao rai Việt Nam hăng hơdôm bôh dêh čar, biă ñu bruă kơđi čar-pơtom hiăp, bơwih ƀong-sĭ  mơdrô-tuh pơplai, pơgang rơnuk rơnua plơi pla-lŏn ia, pơtô pơhrăm, bôh thâo phrâo-hơdră mă yua măi mok...; gum hrŏm kơjăp dong pioh pơjing sa ASEAN gum hrŏm hơbit, pơlir hơbit, kơtưn gum hrŏm amăng kual, ngă tui bruă phun amăng pơsir hơdôm tơlơi rơnuk rơnua plơi pla, bruă mă ƀơi kual. Ƀrô djơ̆ tal anai, Khua dêh čar ta hmâo jak iâo khua mua gưl dlông hơdôm bôh dêh čar pơkiăo nao mơnuih pơ ala gưl Khua Ding jum nao pơhmư̆ mông Bơkơtuai pơgi kơdih anai ASEAN pơkă hlâo pơphun ƀơi Hà Nội amăng lơ 23/4/2024./.