Mơguah tom brơi lơ 17/3, ƀơi ƀirô mă bruă Ping gah tơring čar Lâm Đồng hmâo pơphun Jơnum pok pơhai Tơlơi pơsit mơ̆ng Ding jum kơđi čar kơ bruă mơnuih apăn bruă. Ơi Nguyễn Thái Học, Kơ-iăng Khua Grŭp mă bruă Ping gah dêh čar ta Ding kơna Grŭp črâo ba pơplih tơlơi phiăn dêh čar dưi brơi nao mă bruă ngă jăng jai Khua git gai Ping gah tơring čar Lâm Đồng.

Kiăng pơhlôm bruă git gai ƀơi anăp, abih bang, na nao mơ̆ng Ding jum kơđi čar, Grŭp ding kơna git gai Ping gah hăng Ping gah dêh čar ta pioh kơ Ping gah tơring čar Lâm Đồng, Ding jum kơđi čar pơsit brơi ơi Nguyễn Thái Học nao ngă jăng jai Khua git gai Ping gah tơring čar Lâm Đồng rơwang bruă mơ̆ng thun 2020-2025. Ơi Nguyễn Thái Học tơkeng thun 1972, plơi pla pơ̆ să Hoà Quang Bắc, tơring glông Phú Hoà, tơring čar Phú Yên; hmâo bôh thâo Nai prin tha gah kơsem min bruă kơđi čar, mơnuih pơhrăm tơlơi phiăn; pơhrăm bruă kơđi čar. Pơhiăp čơkă bruă mă, ơi Nguyễn Thái Học pơdah pran jua ư-ang lơm dưi hmâo Ding jum kơđi čar, Grŭp ding kơna git gai Ping gah dêh čar, Grŭp pơphun bruă mă Ping gah dêh čar đăo gơnang, jao bruă gơgrong yôm phăn phrâo./.