Mơguah kơnôl 15/9, ƀơi Ƀirô mă bruă, Khua git gai Ping gah, Khua mir sir ơi Tô Lâm hăng bơnai ñu git gai mông čơkă ơi pơtao dêh čar Thái Lan hăng bơnai ñu. Tal rai čuă pơphun krĕp hrơi dua bơnah pioh hơdor glăi 50 thun akŏ pơjing tơlơi rô nao rai pơtom hiăp-jing tơlơi kơđŏm glăi yôm phăn amăng bruă pơđĭ kyar tơlơi rô nao rai dua bơnah. Tal rai čuă mơng ơi pơtao dêh čar Thái Lan ngă pơtong sit hơdôm tơlơi ƀuăn pơtom hiăp gưl prong kơplah wah Khua mua dua boh dêh čar amăng hrơi blan rơgao, sit biă ñu tơlơi ƀuăn pok pơhai tŭ yua hơdră bruă “Tlâo tơkuh nao rai”.

Anai lĕ bruă tơkuh nao rai sĭ mơdrô, pơkra pơjing hăng bơwih ƀong huă kơplah wah dua bơnah; tơkuh nao rai anom bơwih ƀong hăng ƀon lan; tơkuh nao rai hơdôm hơdră pơđĭ kyar hơđong kjăp; gir run tañ ba rơnoh sĭ mơdrô dua bơnah truh 25 klai đôlar Mi tui jơlan bơkơnar, hơđong kjăp. Tal rai čuă amra kơđŏm glăi tơlơi pơplih amăng tơlơi rô nao rai gru grua dua bơnah, ba tơlơi ngă giang mah Việt Nam-Thái Lan pơđĭ kyar jai hrơi dơlăm tui, sit nik, hơđong kjăp hăng tŭ yua, yua kơ tơlơi dưi mơng mơnuih ƀôn sang dua bơnah, yua kơ tơlơi rơnuk rơnua, hơđong hăng pơdrong asah amăng kual./.