Ƀơi mông tŭ jum, Khua pơ ala mơnuih ƀôn sang dêh čar ơi Trần Thanh Mẫn lăi pơtong, tal rai čuă jơmư anai mơ̆ng grup hơmâo ngă pơkơjăp tui hloh bruă ngă hrŏm plah wah sang bruă čih pơkra tơlơi phiăn dua boh dêh čar, hơmâo kĭ pơkôl thun 2024 laih anun jai yom hloh amăng hrơi mông dua bơnah hlăk pok pơhai ngă tui kơjăp tơlơi rô nao rai yom pơphăn hăng hlom bom hloh, abih bang kiăng pơdjru nao rai, kah pơpha hrŏm bruă kơñ pơgi plah wah Việt Nam hăng Khač.

Dua bơnah khua mua hơmâo tŭ ư hrŏm hăng lăi lĕ, anŏ gêh găl, tơlơi hơmâo hăng bruă či ngă hrŏm dua bơnah, biă mă ñu tơlơi bơwih ƀong huă, sĭ mơdrô, tuh pơ alin dŏ prong đôč. Dua bơnah tŭ ư hrŏm lĕ, Việt Nam hăng Khač jai gum pơgôp hloh, gum pran jua hrŏm pioh ngă tui jơlan đĭ nao kiăng abih bang mơnuih mơnam ngă pô hăng pơđĭ kyar lơ̆n ia kơñ pơgi ni anăp; laih dơ̆ng, anom bruă čih pơkra tơlơi phiăn dua bơnah kiăng kơtưn ngă hrŏm, kah pơpha nao rai tơlơi thâo thăi bruă čih pơkra tơlơi phiăn, krăp lăng bruă ngă tui tơlơi phiăn, kiăng akŏ pơjing anih mă bruă tui tơlơi phiăn pơkă ngă gêh găl hloh kơ djop mơta bruă pơđĭ kyar bơwih ƀong huă hăng ngă hrŏm dua bơnah dêh čar.