Khua djop djuai ania mơnuih mơnam dêh čar Khač, ơi Vương Hộ Ninh hok mơak ƀuh ơi Vương Đình Huệ Khua git gai pơ ala mơnuih ƀôn sang dêh čar ta nao čuă dêh čar Khač tal blung a hăng bruă apah phrâo anai. Dua čô khua tŭ ư nao rai ngă dơlăm tui bruă ngă hrŏm plah wah dua anom bruă djop djuai ania mơnuih mơnam Việt Nam hăng Khač, kơtưn pơblih tui bruă hrăm tơdruă tơlơi thâo thăi pioh djă pioh hăng ngă tui klă, tŭ yua hloh tơlơi gơgrong ba mơ̆ng rim sang bruă amăng tơlơi hơdip bruă kơđi čar kơ rim boh dêh čar.

Khua git gai pơ ala mơnuih ƀôn sang dêh čar rơkâo dua bơnah pơtrut hloh bruă ngă sĭ mơdrô kiăng pơđĭ rơnoh pơhrui glăi hăng ngă bơkơnar rơnoh gơnam sĭ mơdrô, hơđong kjăp, kơtưn gum nao rai lu hloh, pơtruh nao rai amăng jơlan lŏn, jơlan rơdêh treng, pơtrut pơsur ƀing ngă bruă sĭ mơdrô dêh čar tuh pơ alin kơčăo bruă pơprong, tŭ yua, ba gru hlâo hloh amăng tơlơi thâo thăi mơ̆ng dêh čar Khač; pơphun klă bruă bưp nao rai giăng mah, pŭ ƀăn, jĕ giăm mơnuih ƀôn sang dua bơnah kah hăng ƀing hlăk ai tơdăm dra, jơnum bưp nao rai mơnuih ƀôn sang, bơkơtuai hrŏm ƀing ngă bruă amăng anom bruă wai lăng djop djuai ania mơnuih mơnam Việt Nam hăng dêh čar Khač, kah hăng anom bruă mơnuih tơpuôl, khul đah kơmơi.

Amăng tal nao čuă sit nik dêh čar Khač mơ̆ng Khua git gai pơ ala mơnuih ƀôn sang dêh čar ơi Vương Đình Huệ, mơguah lơ 9/4, ƀơi Bắc Kinh, Anom bruă rơdêh por dêh čar Việt Nam (Vietnam Airline) pơphun ngă lơphet 30 thun pok jơlan por hăng čơkă tal por 100.000 kơplah wah Việt Nam - Khač.

Amăng 30 thun, dơ̆ng mơ̆ng hrơi pok jơlan por pơ dêh čar Khač, Vietnam Airline hơmâo pơphun 100.000 wơ̆t por nao rai, pơgiăng rơbêh 11 klăk wơ̆t čô tuai hăng 166 tơbâo tơn gơnam. Lăp đing nao hloh, găn rơgao tơnap tap yua klin Covid-19 ngă, Vietnam Airlines jing sa amăng hơdôm Anom bruă rơdêh por blung a tô glăi glông por nao pơ dêh čar Khač, laih anun gir ngă bruă pơtruh nao rai rơdêh por, tuai čuă ngui pơ anai lơ̆m klin kheng dưi pơgang. Ƀơi mông ngă lơphet, Vietnam Airlines hăng ƀing gŏp bơwih ƀong mơ̆ng dêh čar Khač hơmâo kĭ hră ngă hrŏm laih anun pơtrut ngă hrŏm amăng djŏp glông por nao rai kơplah wah Việt Nam hăng Khač.