Ơi Vương Đình Huệ tơkeng rai hăng prô̆ tơdăm dra prăm dra mơ̆ng sang anŏ ngă hơkrŭ, ñu mut mă bruă čar mơ̆ng thun 1979, hrăm truh bruă nai tha prin, nai prin tha (GS-TS) gah tơlơi bơwih ƀong huă. Lơ 9/3/1984, ñu dưi mut ping gah lơ̆m dŏ ngă nai pơtô sang hră gưl prong hrăm bruă prăk kăk jŭ yap Tài chính kế toán Hà Nội.

Pơhiăp amăng mông jơnum, khua gum bruă git gai ping gah, khua anom pơphun bruă mă ping gah dêh čar, yă Trương Thị Mai lăi pơtong, amăng abih 40 thun rơgao ngă ding kơna ping gah, mah dŏ amăng anih pơpă, bruă mă hơƀơi hai, ơi Vương Đình Huệ ăt tong ten na nao hăng ping gah, hăng lŏn ia laih anun mơnuih ƀôn sang amăng dêh čar, kjăp tơlơi pơmin pran jua hăng tơlơi pơtô ba hơdrôm hră Mak Lênin, tơlơi pơmin mơ̆ng Hồ Chí Minh, ngă tui tơhnal pơkă rơngai kơ lŏn ia djuai ania, kiăo tui jơlan hơdră ngă pô bơkơnar amăng mơnuih mơnam. Ơi Vương Đình Huệ ƀu pơdơi ôh hrăm, pơđĭ na nao tơlơi pơmin pran jua, ƀư̆ pơkra brơi găl brơi djơ̆, jing mơnuih ba gru hlâo hrŏm hăng ƀing adơi ayong amăng anih mă bruă laih anun ding kơna amăng khul apăn bruă ping gah dêh čar, Ding jum kơđi čar, Khul apăn bruă git gai ping gah dêh čar gum hrŏm amăng bruă mă pơblih phrâo, man pơdong hăng pơgang lŏn ia.