Pơhiăp amăng mông jơnum, Khua git gai pơ ala mơnuih ƀôn sang dêh čar ơi Vương Đình Huệ lăng yôm bruă Khua mua git gai bruă hlăk ai tơdăm dra mut phung rơnuk HCM ruah mă akŏ bruă či ngă amăng thun 2023 hăng akŏ bruă Blan pioh kơ hlăk ai lir hơbit hăng “Pơblih yua mrô”. Anai lĕ, bruă mă yôm, ječ ameč biă mă, kiăng ngă giong bruă hrom hăng rơnuk phrâo, ba dêh čar ta mut phung hlom bom, pơđĭ kyar hmao hăng rŏng lŏn tơnah.

Kơ bruă mă tơdăm dra mut phung hăng bruă mă djru tơdăm ngek dra muai pơ anăp, Khua git gai pơ ala mơnuih ƀôn sang dêh čar rơkâo, Anom bruă tơdăm dra mut phung rơnuk HCM ăt khom kơsem min, pơsit tong ten hloh tơlơi pơmin pran jua, bruă mă phun amăng bruă git gai wai lăng hlăk ai, tơdăm dra mut phung tui Hră pơtrun jơnum ping gah dêh čar tal XIII, kiăng tŏ tui jŭ yap, ngă rơđah tui bruă pok pơhai kiăng djơ̆ hăng anŏ gêh găl sit nik. Ăt amăng pơđĭ tui rơnoh yôm hăng akŏ pơjing gru hiam kơ hlăk ai tơdăm dra rơnuk phrâo “Pran jua hiam, tơlơi pơmin rơđah, tơlơi kiăng prong”. Anom bruă tơdăm dra mut phung hăng hlăk ai khom jing mơnuih ba jơlan hlâo amăng bruă pơblih yua mrô gưl dêh čar, bơwih ƀong huă tui mrô.