Ƀơi mông jơnum lok 2, Jơnum min pơ ala mơnuih ƀôn sang tơring čar Dak Lăk tal 11, rơwang thun 2026-2031 pơphun ruah khua, pơhrua tui Kơ-iăng khua jơnum min mơnuih ƀôn sang tơring čar hăng Ding kơna Jơnum min mơnuih ƀôn sang tơring čar, laih dong sem lăng brơi pơdơi bruă sa Ding kơna Jơnum min mơnuih ƀôn sang tơring čar đah mơ̆ng dưm dăp giong khua mua, git gai Jơnum min mơnuih ƀôn sang tơring čar. Khul pơ ala mơnuih ƀôn sang tơring čar Dak Lăk tŭ ư ruah ơi Y Nhuân Byă, Ding kơna Ping gah, Kơ-iăng khua pơphun bruă Ping gah tơring čar ngă Kơ-iăng khua jơnum min mơnuih ƀôn sang tơring čar Dak Lăk tal 11, rơwang thun 2026-2031. Ruah ơi Hồ Quang Đệ, Ding kơna ping gah tơring čar, Khua gơnong bruă Man pơdong ngă Ding kơna Jơnum min mơnuih ƀôn sang tơring čar Dak Lăk tal 11, rơwang thun 2026-2031.

Khul pơ ala mơnuih ƀôn sang tơring čar Dak Lăk ăt tŭ ư hơdôm tơlơi pơsit bruă brơi pơdơi ngă Ding kơna Jơnum min mơnuih ƀôn sang tơring čar Dak Lăk tal 11, rơwang thun 2026-2031 hăng ơi Trần Văn Tân, Khua hơđăp Gơnong bruă prăk, yua hơmâo jao ngă bruă pơkŏn laih. Bruă pơhrua ƀing khua amăng Jơnum min mơnuih ƀôn sang tơring čar Dak Lăk hơmâo ngă tui djơ̆ tơlơi phiăn, kiăo tui tơlơi kiăng dưm dăp mơnuih ngă khua tơdơi kơ ngă tui hơdôm tơlơi pơtrun kơ bruă ruah khua, laih dong pơhlom anŏ klă wai lăng, git gai mơ̆ng gong gai tơring čar thun blan pơ anăp./.