Amăng rơwang bruă laih rơgao, Khul đah kơmơi mut phung djop gưl hơmâo prăp lui klă boh yom phun, hơdră či mă bruă, pơdah thâo bruă mă gum hrŏm amăng khul bơkơtưn mă bruă “Akŏ pơjing kơnuih hiam đah kơmơi Việt Nam rơnuk phrâo”;  tơlơi jak iâu ngă “Man pơdong sang anŏ 5 ƀu hơmâo, 3 rơgoh”; lu bruă mă djru ba ƀing đah kơmơi pơhrŏ ƀun rin, pơđĭ kyar bơwih ƀong huă dưi pok pơhai lu tui, djru hrŏm rơbêh 200 rơbâo sang anŏ đah kơmơi dưi pơklaih mơ̆ng ƀun rin; 118 rơbâo čô đah kơmơi dưi djru pơphun bruă mă hăng akŏ pơjing phrâo rơbêh 700 boh sang bruă ngă hrŏm yua đah kơmơi ngă khua git gai wai lăng….

Jơnum tal anai ruah khul apăn bruă đah kơmơi gưl dêh čar tal XIV hơmâo 111 čô. Yă Lê Thị Thủy djơ̆ glăi ngă khua Khul đah kơmơi mut phung Việt Nam rơwang bruă phrâo.

Pơhiăp git gai mông jơnum, ơi Trần Thanh Mẫn, Khua git gai pơ ala mơnuih ƀôn sang dêh čar lăi, amăng hơdôm gưl rơnuk thun gru phun lŏn ia ta, đah kơmơi Việt Nam ăt pơtong rơđah tơlơi gơgrong yom amăng djop bruă mă, tơlơi hơdip mơda mơnuih mơnam. Ơi Trần Thanh Mẫn đăo kơnang, hăng gru grua hiam klă, tơlơi khăp lŏn ia, pran jua hur har khin hơtai, să drơi yua tơlơi thâo khăp pap, pơčeh phrâo hăng tơlơi pơmin hrưn đĭ kơtang đah kơmơi Việt Nam ăt hơmâo lu tơlơi pơgôp hrŏm prong prin kơ bruă pơtrut pơđĭ kyar hmar hăng hơđong kơjăp kơ lŏn rơnuk  rơbâo thun hrưn đĭ phrâo, lăp hăng 8 boh hră mah  mơ̆ Wa Hô pioh kơ ƀing đah kơmơi Việt Nam “Khin hơtai-kơjăp kơtang, tong ten-triăng kơ bruă”.