Amăng mông mă bruă, Khua tơring čar Nghệ An hmâo ba tơbiă hơdôm ƀut tơlơi bơdjơ̆ nao truh hơdră bruă wai lăng prăk kak – ngăn drăp kơnuk kơna; hơdră bruă wai lăng plơi prong, kông ngăn lŏn drŏn, anih anom dô̆; hơdră bruă wai lăng tuh pơplai; pơđĭ kyar bơwih ƀong ia rơsĭ; pơphun glông bruă mă, pơkra... Pơhiăp črâo ba mông mă bruă, Khua git gai wai lăng pơ ala mơnuih ƀôn sang dêh čar ta, ơi Vương Đình Huệ lăi rơđah, Tơlơi pơtrun pơsit mrô 39 mơ̆ng Ding jum kơđi čar jao kơ Ping gah Khul Khua pơ ala mơnuih ƀon sang pel ĕp, mă yua pơhrua nao sa dua hơdră pơkă, hơdră bruă pha ra ha jăn pioh pơdŏng tơring čar Nghệ An pơđĭ kyar abih bang, hmâo bôh than phun, lăp djơ̆ hăng bruă pơđĭ kyar bơwih ƀong mơnuih mơnam mơ̆ng đơ đam dêh čar, pơkă kual lŏn ia hăng pơkă kual Kơdư Tŏng Krah dêh čar hăng kual ia rơsĭ Tŏng Krah dêh čar; hrŏm hăng anun hmâo hơdră pơkă kơ hơdră bruă đĭ dlông hloh pioh pơđĭ kyar plơi prong Vinh jing anih anom phun bơwih ƀong – bôh thâo mơ̆ng kual Kơdư Tŏng Krah dêh čar.

Khua git gai wai lăng pơ ala mơnuih ƀôn sang dêh čar ta rơkâo, tơring čar Nghệ An pel ĕp glăi hơdôm hơdră bruă mơ̆ hơdôm tơlơi phiăn phrâo dưi hmâo Khua pơ ala mơnuih ƀon sang mă yua amra pơphun, pioh bĕ bơrơkua amăng Tơlơi pơtrun pơsit; hơdôm hơdră bruă lơm ngă giong khom pơhlôm amuñ ngă tui, dưi ngă. Tơdơi kơ jơnum anai, Jơnum min prăk kak Ngăn drăp mơ̆ng Khua pơ ala mơnuih ƀôn sang dêh čar ta gum hrŏm Ding jum kơčăo bruă tuh pơplai hăng pran jua gơgrong prong hloh pioh ngă giong, tañ lăi pơthâo kơ Jơnum min apăn bruă Khua pơ ala mơnuih ƀôn sang hăng Khua pơ ala mơnuih ƀôn sang./.