Bơdjơ̆ nao bruă apui ƀong glai bạch đàn ƀơi să Hơ Moong, tơring glông Sa Thầy amăng lơ 7/3 ngă 2 čô mơnuih gum prah apui djai hĭ, mơguah lơ 14/3, Anom bruă Ping gah tơring čar Kon Tum hơmâo mơ-it hră kơ Khul khua gum bruă git gai Ping gah Jơnum min mơnuih ƀon sang tơring čar lăi pơthâo glăi tơlơi git gai mơng Khul khua apăn bruă Ping gah tơring čar kơ bruă anun.

Tui anun, khua mua apăn bruă Ping gah tơring čar Kon Tum jao kơ Khul khua gum bruă git gai Ping gah Jơnum min mơnuih ƀon sang tơring čar git gai ječ ameč hơduah ĕp kơđi tơlơi, pơsit rơđah phun tơhnal hăng bơtơhmal anom bruă, mơnuih bơdjơ̆ nao pioh hơmâo tơlơi truh anai. pơsir bruă hiư̆m pă thơ lăi pơthâo glăi kơ Khua mua apăn bruă Ping gah tơring čar hlâo kơ lơ 25/3/2023.