Tui pel ĕp blung a, rơnuč blan 10/2023, anom bruă wai lăng plang mơnuih mơnam hăng anom bruă pơgăn ƀing ngă soh hơmâo mă yua boh thâo măi mok gah kông ang tơring čar Dak Lak tŭ mă hră ƀom kiơng mơng sa čô mơnuih dŏ amăng să Ea Tu, plơi prong Buôn Ma Thuột, hăng lăi pơthâo hơmâo sa čô mơnuih plư sĭ bơnga lay ơn amăng plang mơnuih mơnam hưp ƀong 10 klăk prăk. Hăng hơdôm hơdră pel ĕp, kông ang pơsit tong mơnuih plư mă lĕ Nguyễn Văn Khởi, glăk dŏ hơdip amăng tơring čar Sóc Trăng.

Mă bruă hăng kông ang, blung hlâo Khởi lăi pơthâo, ñu hlâo anun ăt mă pơkŏng yua plư pleč arăng, bruă ngă soh anai aka ƀu lŏm hĭ ôh. Rơnuč thun 2022, pô anai phrâo tơbiă mơng sang krư̆ hăng tŏ tui pơmĭn amra plư mă kông ngăn arăng dong. Kiăng kơ dưi ngă tui tơlơi ñu pơmĭn, Khởi yua Facebook hăng anăn “Hoa Tươi Đà Lạt”, mut hrŏm grup sĭ pơjeh bơnga hăng boh truh amăng plang facebook.

Lơm arăng rơkâo blơi gơnam, Khởi rơkâo mơ-it nao prăk hlâo kah mơng hiăp bit, plư mă prăk arăng. Bruă mă anai, ƀuh mơng rơnuč thun 2022 truh ră anai, Khởi hơmâo plư giăm 100 čô mơnuih ƀơi hơdôm boh tơring čar, ƀôn prong đơ đam dêh čar, hăng mrô prăk rơbêh 500 klăk.