Ƀơi mông jơnum pơrong sai kơ anăp ngă bruă pơgang anŏ mơtah mơda hăng ngă tui tơlơi pơtrun tơhnal pơkă ESG (Anih hơdip jum dar-Mơnuih mơnam-Git gai wai lăng) yua Jơnum min mơnuih ƀôn sang tơring čar Gia Lai pơphun, rơbêh 120 čô pô pơ ala nao jơnum, jing ƀing mơnuih kơhnâo kơhnăk, ƀing khua mua git gai wai lăng hăng sang bruă mơdrô hơmâo pơčrong sai hrŏm hơbit, djru kơ djop sang bruă khom ngă djơ̆ tơlơi kiăng phrâo mơ̆ng anih anom sĭ mơdrô. Lu tơlơi pơgôp hiăp lăi lĕ, pơblih anŏ mơtah mơda jing sa bruă khom ngă pioh kơ anom bruă mơdrô dưi tŭ mă hră blơi gơnam tam, pok prong anih anom sĭ mơdrô laih anun pơđĭ tui hnơ̆ng pơhno nao rai sĭ mơdrô tơpă.

Ƀing mơnuih rơgơi kơhnâo ăt lăi pơthâo kơ sang bruă mơdrô kiăng sem kơ bruă pơblih anŏ mơtah mơda jing sa rơnoh tuh pơ alin pioh pơđĭ kyar hơđong, pơhrua nao rơnoh prăk tuh pơ alin sit hơmâo tơlơi ječ ameč pơkŏn. Đĭ pơhiăp amăng mông jơnum bơkơtuai, Khua jơnum min mơnuih ƀôn sang tơring čar Gia Lai ơi Phạm Anh Tuấn lăi pơtong, črăn mơ̆ng thun 2026-2030, tơring čar amra pơtrut brơi pơblih ba yua mrô, pơblih hơdră pioh pơgang anŏ mơtah mơda, pơđĭ kyar bruă tuh tia pơkra ming, apui yua pơkra glăi hăng ngă hmua ba yua boh thâo ia rơgơi phrâo. Tơring čar ăt ƀuăn pơblih mơ̆ng bruă git gai wai lăng, jing bruă mă gum  hrŏm sang bruă mơdrô pok pơhai lu kơčăo bruă.

“Tơring čar Gia Lai amra hơmâo bruă ngă hrŏm hăng ƀing ngă bruă mơdrô amăng bruă pơblih anŏ mơtah mơda. Kơnuk kơna amra djru ba hơdôm bruă mă tum teč hloh, kơnang kơ jơlan hơdră phrâo. Samơ̆ yom hloh lĕ, tơlơi thâo hluh mơ̆ng ƀing khua mua gong gai plơi pla, sang bruă mơdrô ƀuh anai jing bruă khom ngă pơblih kiăng dưi bong kơjăp bruă mă. Tơring čar amra git gai, pơčrâo bruă tong ten hloh brơi pok pơhai ngă tui pơblih pơgang anŏ mơtah mơda hăng bruă ngă hmar, tañ hloh, khut khăt hloh hăng tŭ yua hloh”.

Ƀu kơnong amăng bruă boh thâo ia rơgơi, măi mok đôč ôh, pơplih phrâo mơtah mơda ăt glăk hơmâo Dak Lăk pơsit jing jơlan ngă bruă yom biă mă đah mơ̆ng dưi đĭ kyar ngă hmua tui rơnuk phrâo hăng hơđong. Phrâo rơgao, ƀơi mông jơnum “Đĭ kyar ngă hmua mă yua boh thâo yom: Tơlơi gêh găl hăng hơdră đĭ kyar kơ sang bruă mơdrô”, ƀing kơhnâo pơsit, mah hơmâo rơbêh 824.000ha lŏn ngă hmua hrŏm hăng lu mơta gơnam ba sĭ pơ čar rơngiao, samơ̆ bruă pơhưč tuh pơ alin ngă hmua mă yua boh thâo phrâo ăt aka ƀu djơ̆ hăng tơlơi hơmâo ôh. Tơlơi pơgăn prong hloh ră anai lĕ kơƀah mơnuih mă bruă rơgơi, anih anom, jơlan nao rai aka ƀu bơkơnar, lŏn tơnah gêh găl tơlơi phiăn hơmâo aset đôč, laih anun hră pơ-ar ngă dŏ kaih. Nai prin tha Bùi Thị Ngọc Dung, Sang bruă kơsem min pơkă hơnong man pơdong hăng kač gru ngă hmua lăi:

“Khŏm hơmâo lŏn tơnah hơmâo djŏp hră pơ-ar či pơƀuh kơ sang bruă tu pơ alin. Dua lĕ tơlơi gir ngă bruă mơ̆ng ƀing khua tơring čar hrŏm hăng hơdôm gơnong bruă, plơi pla, gir pơhrŏ ƀiă hră pơ-ar, tui hăng tơlơi pơtrun “pă hrŏ trun” ngă hiư̆m pă kơ sang bruă mơdrô dưi ngă bruă tañ hloh, laih anun arăng tañ hơmâo kơčăo bruă hloh. Klâo lĕ mơnuih mă bruă, hăng pơmut amăng boh thâo mrô abih bang tơlơi pơhing, hră pơ-ar gah bruă ngă hmua. Lơ̆m sang bruă mơdrô gơñu hơduah ĕp, ƀuh mrô rơđah rơđông laih”.

Tui hăng Nai prin tha Phan Việt Hà, Kơ-iăng khua Anom kơsem min boh thâo ia rơgơi ngă hmua pla kyâo Dap Kơdư, đĭ kyar ngă hmua mă yua boh thâo yom kơnong dưi ngă lơ̆m pơlir hơbit plah wah Kơnuk kơna, mơnuih kơhnâo boh thâo, sang bruă mơdrô hăng mơnuih ngă hmua đôč, mơ̆ng anun ruah mă, jao glăi boh thâo ia rơgơi lăp djơ̆ hăng tơlơi kiăng mơ̆ng rim plơi pla, akŏ pơjing bruă pơkra gơnam hơmâo nua yom mơ̆ng akŏ truh pơ tlôn hlao.

“Yom hloh lĕ dưi pơtruh sang bruă mơdrô hăng ƀing rơgơi kơhnâo boh thâo laih anun anom bruă wai lăng. Kiăng dưi ruah boh thâo măi mok lăp djơ̆ hloh, mơ̆ng anun mă yua boh thâo phrâo lăp djơ̆ hăng rim boh tơring, đah mơ̆ng dưi pơtrut tui măi mok ia rơgơi anun amăng mông anai”.