Jơlan hơdră anai pơtum rơbêh 150 čô mơnuih anun lĕ ƀing apăn bruă amăng Khul hlăk ai, ding kơna hlăk ai hăng ƀing bơwih ƀong sĭ mơdrô hlăk ai ba gru mơng tlâo boh dêh čar. Đĭ pơhiăp amăng mông pơbưp, ƀing khua mua lêng lăi pơtong: Việt Nam, Lao hăng Kur juăt gum hrŏm sui mơng đưm hlâo, pơbưp nao rai kiăng pơlir sui pơ anăp; rĭm tơlơi gum hrŏm, djru ba tơdruă găn rơgao thun blan glêh tơnap amăng rơnuk pơklaih rơngai lŏn ia. Amăng rơnuk phrâo, tlâo boh dêh čar tŏ tui gum hrŏm amăng bruă pơjing, wai pơgang hăng pơđĭ kyar lŏn ia.

Tơlơi rô nao rai giang mah lĕ atur phun yôm phăn kiăng djop ƀon lan pok prong ngă hrŏm sit nik amăng djop mơta bruă anun lĕ bơwih ƀong huă, sĭ mơdrô, tuh pơ alin, pơtô pơjuăt, boh thâo ia rơgơi, gru grua hăng tuai čuă ngui. Amăng jơlan hơdră anai, khul hlăk ai tơring čar Gia Lai pơphun kĭ hră pioh hơdor ngă hrŏm amăng rơwang thun 2026-2030 hăng khul hlăk ai tơring čar Sekong, Salavan hăng Attapeu (Lao) kiăng ngă tui hơdôm tơlơi ƀuăn pơđĭ kyar./.