Kơčăo bruă čuk pơkra jơlan Hồ Chí Minh črăn găn nao, weh gah ngŏ plơi prong Ƀuôn Ma Thuôt, tơring čar Dak Lak hơmâo rơnoh prăk tuh pơ alin 1.500 klai prăk, čuk pơkra jơlan găn nao pơ hơdôm tơring glông Čư̆ Mgar, Čư̆ Kuin, Krông Pač hăng plơi prong Ƀuôn Ma Thuôt. Thun blan čuk pơkra mơ̆ng thun 2020 truh abih thun 2023. Kơčăo bruă anai, pơkra jơlan hnong II, ataih 40 km, hnong pơkă rơdêh đuăi hmar 80 km sa mông. Truh ră anai, kơčăo bruă phrâo jao kơnong 60% samơ̆ abih prăk laih pioh pơklaih ala lŏn, duh glăi mơnuih ƀôn sang hăng tui hăng rơnoh jŭ yap prăk dŏ kơƀah 332 klai prăk kah djop prăk pơkra giong jơlan anai.

Tơdah čuk pơkra kaih dơ̆ng, ƀu ngă djơ̆ hrơi blan pơkă lĕ abih thun 2023 anai, Ding jum jơlan glông hăng pơdŭ pơgiăng rơkâo Khua git gai ping gah hăng Khua jơnum min mơnuih ƀôn sang tơring čar Dak Lak khom sem glăi, amra hơmâo hơdră phara či pơsir tơlơi gơgrong ba amăng bruă mă hăng pô khua wai lăng kơčăo bruă anun, tuh pơ alin čuk pơkra jơlan hăng bruă ngă hmua tơring čar Dak Lak pô tuh pơ alin.