Pơ anai, Khul pơphun jơnum hơmâo jao pri apah bơni tal pơplông “Čơđai sang hră djop gưl, čơđai sang hră gưl prong hăng tơlơi pơčeh phrâo pơphun bruă mă” tal V. Tal pơplông anai hơmâo tŭ mă 508 kơčăo bruă amăng 5 mơta bruă kah hăng: Tuh tia pơkra ming, pơčeh phrâo pơkra gơnam sĭ mơdrô; gơnam đang hmua, boh čroh, akan hơdang; bruă pơtô hrăm, tuai čuă ngui, bơwih bơwang, prăk kăk, ia jrao gun, pơgang tơlơi suaih pral, boh thâo ia rơgơi tơlơi pơhing phrâo ngă hiam hăng sĭ mơdrô pơtrut amăng bruă mơnuih mơnam.

80 kơčăo bruă djơ̆ lăp hloh dưi mut čih anăn ruah mă pơplông tal rơnuč. Khul čom puang hơmâo apah bơni 80 pri tui hăng 2 khul čơđai sang hră anih prong hăng gưl prong, amăng anun 10 pri mrô sa, 20 pri mrô dua, 30 pri mrô 3 hăng 20 pri pơsur pran jua. Yă Ngô Thị Minh, Kơ-iăng khua ding jum Pơtô hăng pơjuâ̆t čang rơmang ƀing čơđai sang hră anih prong hăng čơđai sang hră gưl prong ăt kơsem min na nao tơlơi kiăng, anŏ hor pơčah phrâo pơkra ming, dăp hơdră ĕp bruă sĭ mơdrô, kiăng tañ akŏ pơdong bruă mă sĭ mơdrô, djru hrom ngă giong tơhnal pơkă pơđĭ kyar bơwih ƀong huă mơnuih mơnam mơ̆ng thun 2021-2025.