Tơdơi kơ hmư̆ hră lăi pơthâo hăng pơgôp hiăp klah čun ƀơi mông mă bruă, khua ping gah, khua mir sir ơi Tô Lâm lăi rơđah, bruă mă pơhlom, pơgang tơlơi truh lŏn adai ngă mơ̆ng ră anai truh abih thun 2026 ƀu kơnong bruă mă bong glăi tơlơi truh sat đôč ôh, dŏ jing sa bruă mă sem lăng tơlơi thâo git gai bruă mă, pơčrâo ba mơ̆ng abih bang amăng glông bruă kơđi čar; jing anŏ pơkă yom hloh kiăng pơgang tơlơi hơđong bruă mă, tơlơi hơdip mơda mơnuih ƀôn sang, pơgang boh tơhnal pơđĭ kyar hăng ngă tui tơhnal pơkă rơnoh pơsĭ kyar mơ̆ng djop tơring čar.

Khua ping gah, Khua mir sir lăi pơtong, 5 mơta bruă mă git gai pơčrâo ba prong, amăng anun tơlơi kiăng prong hloh, khom pơgang ba tơlơi hơdip mơda mơnuih ƀôn sang yơh phun, kah hăng sa tơlơi pơtrun kơtang hloh khom ngă. Yua dah, dram gơnam, ring bruă anet prong, tơlơi bơwih ƀong huă, ngă hmua pla pơjing dưi rŭ glăi, mă bruă ĕp ƀuh, pơkra ming, samơ̆ tơlơi hơdip ană mơnuih ƀu hơmâo anŏ hơgĕt dưi pơhrua glăi ôh. Djop mơta bruă mă, jơlan hơdră pơtrun, khom pơtum pran jua anăp nao pơgang mơnuih ƀôn sang hlâo hloh, biă mă ñu ƀing tha rơma, čơđai muai, ƀing đah kơmơi pi kian, ƀing rơwen rơwô ƀu klă drơi jăn, mơnuih ƀôn sang dŏ ƀơi anih hŭi rơhyưt hloh; hrŏm hăng bruă pơhlom, pơgang khom nao hlâo sa yak. Ñu ăt rơkâo djop ding jum, anom bruă, tơring čar khom lăi pơthâo jơlan hơdră  či ngă bruă bong glăi adai pơ-iă không phang El Nilno, ba truh adai pơ-iă kơtang phang khôt, ia mơsin hram, kơƀah ia yua, apui ƀong glai; laih dơ̆ng ăt khom hơmâo hơdră pơhlom hlâo tơlơi či truh rơbŭ kơthel hơjan hlim, ia ling dăo, lŏn tơhlom, akŏ tli, bơnư̆ pơkong ia. Hơdră pơhlom pơgang khom mơ-it truh pơ djop tơring, plơi pla, anih hŭi hơmâo tơlơi răm ƀăm kơtang, brơi mơnuih ƀôn sang răng kơđiăng tong ten; biă mă ñu pơčrâo ten kơ bruă ngă khut khăt, tơpă hnơ̆ng, lăi lui hlâo djơ̆, tŭ yua, kiăng pơgang ba kông ngăn dram gơnam hlăk hơmâo hăng pơgang anih hơdip jum dar.