Anom bruă brơi ia yua hơdjă hăng Agaih anih hơdip amăng plơi pla tơring čar Dak Lăk glăk wai lăng, mă yua 44/128 anih pơđoh ia yua mơ̆ng tơring čar, bơwih brơi kơ rơbêh 33.100 čô tuai. Pơhlôm hơmâo ia yua hơđong, Anom bruă ia yua hơdjă hăng agaih anih hơdip amăng plơi pla tơring čar Dak Lăk mơ-it hră kơ hơdôm boh tơring kiăng pơhlôm hơmâo ia yua hơdjă rim hrơi ƀơ̆i, laih dong kiăng Anom bruă apui lơtrik Dak Lăk prăp rơmet klă kiăng hơmâo apui lơtrik hơđong kơ hơdôm anih pơđoh ia.

Ơi Phạm Ngọc Bình, Khua anom bruă ia yua hơdjă hăng agaih anih hơdip amăng plơi pla tơring čar Dak Lăk brơi thâo, hơdôm anom bruă amăng tơring čar hơmâo lăi pơthâo rim hrơi, bruă pel ĕp, pơkra măi mok, đing pơđoh ia hơmâo lăng klă mơn, pơhlôm pơkra tañ, ƀu pioh mơnuih ƀôn sang kơƀah ia yua ôh.