Amăng blan 8 laih rơgao, rim mơguah, anih pơtô tơlơi Yuan kơ ƀing čơđai ƀơi Sang hră gưl sa Nay Der, să Gào, tơring čar Gia Lai hmư̆ mơak, hao hač. Ƀing čơđai hơmâo hrăm boh hră, hrăm hiăp, pơđok, čih, yom hloh dong lĕ khin či pơhiăp tom nai,  tom gơyut gơyâo. Amon Thin, dŏ pơ Plơi Nhao, să Gào, hor nao hrăm biă: “Kâo nao hrăm mơak biă. Hor biă lơ̆m hrăm tơlơi Yuan”.

Thun hrăm phrâo, Sang hră gưl sa Nay Der, să Gào hơmâo 123 čô čơđai mut anih sa, amăng anun lu ană bă djuai ania Jarai. Sit hnun yơh, bruă pơtô, hrăm kiăng rơguăt tơlơi Yuan jing bruă kiăng biă, Mơ̆ng blung dŏ tơnap, sư̆ rơbư̆ mơn, samơ̆ tơdơi kơ anun, ƀing čơđai ñu thâo lăi glăi rơđah hloh yơh. Amăng mông hrăm gơñu yơr tơngan lơ̆m nai tơña. Hăng nai neh Lê Thị Thùy Khanh, anun jing tơlơi wơ̆t nai hăng čơđai mơak soh: “Anih kâo pơtô hơmâo 100% čơđai djuai ania ƀiă soh, pơ sang gơñu juăt hiăp tơlơi Jarai. Samơ̆ tơ tă anai gơñu gir hrăm, thâo tui laih, kâo pơtô pơblang tơlơi hrăm hăng tơlơi Yuan jing gơñu thâo hluh mơn”.

Kar kăi hnun mơn, Sang hră gưl sa Lê Hồng Phong, phường Hội Phú, hơdôm boh sang hră pơtô tơlơi Yuan ăt hơmâo pok mơn amăng bơyan pơdơi sang hră. Ƀing čơđai nao pơ sang hră hrăm boh hră, hrăm rek tui gru boh hră, pơđok mơ̆ng ha boh. Amăng mông hrăm, nai Nguyễn Thị Hồng pơtô rah boh hră, pơhiăp rah hăng ƀing čơđai, kiăng gơñu tañ thâo hiăp tơlơi Yuan. Ƀơi anŏ ñu, nai ăt hrăm tui mơn tơlơi Jarai kiăng bruă pơtô, hrăm jê̆ giăm hloh: “Amĭ ama čơđai sang hră lăng ba biă kơ bruă hrăm mơ̆ng ană bă gơñu, pơgiăng ană bă nao hrăm djơ̆ mông, prăp lui djŏp gơnam yua brơi ană bă nao sang hră. Lu ană amon thâo laih boh hră, thâo kač tui gru boh hră, pơđok rơđah yơh. Gơmơi hai ăt hrăm tui mơn tơlơi Jarai kiăng thâo ƀing čơđai ñu kiăng anŏ hơget”.

Tui hăng nai neh Trần Thị Kim Tuyến, Khua sang hră gưl sa Lê Hồng Phong, ƀu kơnong phường Hội Phú ôh, lu sang hră ƀơi tơring čar leng kơ pok anih pơtô tơlơi Yuan kơ ƀing čơđai djuai ƀiă amăng bơyan pơdơi prong. Sang hră prăp lui anih hrăm, gơnam pơtô hrăm, laih dong brơi nao ƀing nai hơmâo pơtŏp rơguăt laih jơlan hơdră pơtô tơlơi Yuan kơ čơđai djuai ƀiă hlâo či mut hrăm anih sa hăng 120 hrơi hrăm amăng bơyan pơdơi prong, kiăng čơđai thâo hloh lơ̆m mut thun hrăm phrâo. Nai neh Trần Thị Kim Tuyến brơi thâo: “Kâo pơmin amăng hrơi blan pơtô tơlơi Yuan hlâo či mut anih sa, ƀing čơđai ñu thâo pơhiăp rơđah, thâo hluh hloh mơn. Mut thun hrăm phrâo, ƀing čơđai ñu hrăm tom gơyut gơyâo, dưi kiăo tui mơn tơlơi hrăm phrâo”.

Tơdơi kơ pơmut hrŏm, tơring čar Gia Lai hơmâo mrô djuai ania ƀiă 23%. Bruă pơtô tơlơi Yuan brơi ƀing čơđai hlâo či mut anih sa jing djru čơđai ñu thâo hiăp, thâo hluh, mơak lơ̆m mut thun hrăm phrâo. Anai jing bruă ngă mơ̆ng tơring čar Gia Lai djru čơđai pơ kual tơnap tap dưi hrăm klă hloh./.