Mơng akŏ thun truh ră anai, đơ đam tơring čar Gia Lai ƀuh 9 wŏt čơđai ia ƀlung, ngă 13 čô djai, lu hloh lĕ ƀing čơđai kual tơnap tap, kual mơnuih djuai ania ƀiă dŏ hơdip. Khul hlăk ai tơring čar Gia Lai brơi thâo, rĭm thun, Khul hlăk ai ăt pơphun hơdôm tal pơtô brơi čơđai luai ia. Ƀơi anăp kơ bruă ƀuh lu čơđai kual tơnap tap ia ƀlung, thun anai khul amra pok pơhai bruă mă tơl hơdôm kual ataih, asuek, ƀing gum bruă phun lĕ ƀing apăn bruă amăng khul hlăk ai amăng plơi pla kiăng kơ djru brơi ƀing čơđai dưi hrăm luai ia.

Ơi Phạm Trần Anh, Kơ-iăng Khua gơnong bruă mă, tơhan rơka hăng mơnuih mơnam tơring čar Gia Lai brơi thâo, kiăng pơgang hŭi ƀuh ƀing čơđai ia ƀlung kiăng hơmâo tơlơi gum hrŏm mơng abih bang mơnuih, sit biă ñu lĕ rĭm boh sang anŏ kiăng đing nao ƀiă dong kơ bruă wai lăng ƀing čơđai, sit biă ñu amăng bơyan pơdơi prong pơ anăp anai.