Tui hăng hră lăi pơthâo, amăng 8 blan mơ̆ng akŏ thun 2026, rơnoh prăk duh jia pơhrui glăi kơ kơnuk kơna ƀơi Quảng Ngãi giăm 24 rơbâo klai prăk, đĭ hloh 10%  pơkă hăng tal anai mơ̆n thun hlâo. Đơ đam tơring čar hơmâo mă yua laih 2.800 klai prăk, kiah ngă tui 35% akŏ bruă jao amăng sa thun.

Kiăng pơsir tơlơi tơnap tap, gun gan amăng bruă pok pơhai ngă tui akŏ bruă pơđĭ kyar bơwih ƀong huă mơnuih mơnam mơ̆ng thun 2026-2030, tơring čar Quảng Ngãi rơkâo Ding jum prăk kăk ăt đing nao, ngă gêh găl brơi hơdôm mơta bruă mă pơdjơ̆ nao akŏ bruă kiăng pơdong anih hrong ia jâo hăng apui yua kơ dêh čar ƀơi ƀut bơwih ƀong sang măi Dung Quất; pơđĭ kual gong gai phara Lý Sơn jing anih anom tuai hyu ngui kual ia rơsĭ-bul pơtâo plao ia rơsĭ dêh čar; pok pơhai ngă tui dơ̆ng kơčăo bruă čuk pơkra jơlan rơdêh đuăi hmar Quảng Ngãi-Kon Tum; pơđĭ tui, pok pơhư prong jơlan 24 pơtruh nao rai plah wah Quảng Ngãi hăng Kon Tum. Laih dơ̆ng, pơhrua nao lu rơnoh prăk, gơnam yua mă bruă pơtrut pơđĭ kyar tơlơi bơwih ƀong huă, kiăng ba tơring čar Quảng Ngãi jing anih anom phun bơwih ƀong huă kual ia rơsĭ beč bal ƀiă mơ̆ng dêh čar.