Hăng đơ đam lŏn mơnai prong rơhaih 24.000 Km2, mrô mơnuih giăm 4 klăk čô, Lâm Đồng dưi pơsit jing anih phun pơtrut pơđĭ kyar hloh amăng kual Dơnung tong krah hăng Dap Kơdư. Tui hăng anŏ pơkă glăi, anih anom pơđĭ kyar amra pơphun tui 3 kual lŏn Dap Kơdư, kual ter tơkai čư̆ siăng či trun nao pơ lŏn čor dăo truh pơ kual ia rơsĭ. Amăng anun, kual ƀơi Đức Trọng, Đơn Dương, Lâm Hà hăng Di Linh dưi pơkă pioh man pơdong plơi prong hăng ngă anih mă bruă kơnuk kơna-kơđi čar kơ tơring čar, pơdong ƀơi să Đức Trọng. Kual Đà Latj lĕ akŏ pơdong anih anom pơdơi pơdă, čơkă tuai hyu ngui, anih anom gru grua hiam mơak, pơtô hrăm, kơsem min boh thâo ia rơgơi hăng tuai čuă ngui amăng glai klô kyâo pơtâo, djơ̆ hnơ̆ng pơkă jar kmar.

Tui hăng ơi Tôn Thiện Sơn, Khua Gơnong bruă Prăk kăk tơring čar Lâm Đồng, tơring čar amra akŏ pơdong 6 anih phun tơkuh nao rai bơwih ƀong huă Kơdư-Dơnung hăng Yŭ -Ngŏ, pơtruh nao rai hăng hơdôm anih hmư̆ hing mơ̆ng kual Dap Kơdư trun nao pơ ia rơsĭ. Rơnoh prăk kiăng tuh pơ alin nao kơ bruă anai him lăng rơbêh 1 klăk klai prăk, amăng anun prăk kơnuk kơna năng ai 80%.

“Pơkă hnơ̆ng tơring čar hơmâo pơtong rơđah anăp nao tuh pơ alin djop bruă, djop tơlơi hơmâo, phun, anŏ gêh găl, lŏn mơnai glai klô dưi pơhno hăng djru pơtrut rơnoh pơđĭ kyar phrâo kơ tơring čar. Anun lĕ, jơlan glông nao rai, logistics, pơđĭ kyar plơi prong, tuai čuă ngui tŭ yua klă hloh, bruă ngă hmua ba yua boh thâo ia rơgơi phrâo, tu tia pơkra ming, apui yua ia jâo hăng sĭ mơdrô bơwih bơwăng, pơtô hrăm,, bruă ia jrao, gru grua hiam, pơrơguăt drơi jăn, kơsem min boh thâo ia rơgơi hăng pơblih pơčeh phrâo”.

Ơi Hồ Văn Mười, ding kơna apăn bruă ping gah dêh čar, Khua Jơnum min mơnuih ƀôn sang tơring čar Lâm Đồng brơi thâo, bruă pơkă hnơ̆ng glăi tơring čar yom biă mă, tơdơi kơ pơmut glăi klâo boh tơring čar Lâm Đồng, Bình Thuận hăng Dak Nông, ngă atur tui tơlơi phiăn pơkă hăng anăp nao bruă mă phrâo pơđĭ kyar hloh. Jơnum min mơnuih ƀôn sang tơring čar Lâm Đồng lăi pơtong, Lâm Đồng ră anai jing tơring čar hơmâo đơ đam lŏn mơnai prong hloh amăng dêh čar, hơmâo lu anŏ gêh găl kông ngăn lŏn mơnai glai klô, bruă pơkra ming apui yua rơgoh, bruă ngă hmua phrâo hăng tuai hyu ngui, yua kơ anun kiăng pơkă hnơ̆ng djơ̆ lăp pioh pơtrut pơđĭ kyar đut tơhnal, ngă pran kơtang pơđĭ kyar sui thun.

“Pơkă hnơ̆ng ƀư̆ pơkra glăi tal anai kiăng ngă tui khut khăt mơ̆ng tơring čar kiăng pơblih tơlơi pơmin, bruă mă pơđĭ kyar, lăng kơ mơnuih ƀôn sang hăng ƀing ngă bruă mơdrô yơh phun, lăng kơ kơsem min boh thâo ia rơgơi, pơblih pơčeh phrâo, ba yua mrô hăng rơnoh pơđĭ kyar mơtah jing pran kơtang ngă bruă. Anăp nao tơhnal pơkă man pơdong tơring čar Lâm Đồng jing anih ba gru hlâo rơnoh pơđĭ kyar hmar amăng kual Dap Kơdư hăng Dơnung tong krah. Pơkă hnơ̆ng man pơdong ƀu kơnong pơtong rơđah tơhnal pơkă pơđĭ kyar ƀơi anăp đôč ôh, dŏ jing lăng nao pơ anăp adih, kơñ pơgi; ƀu kơnong ba yua tŭ yua anŏ gêh găl lŏn mơnai glai klô đôč ôh, dŏ jing pơtrut bruă ngă pơđĭ kyar kơtang hloh”.