Ƀơi să Tuy An Đông, tơhan kông an, tơhan ƀô̆ đô̆i hrŏm hăng gong gai ba nao măi mok, rơdêh, djru ba hơdôm boh sang anŏ hơmâo sang dŏ amăng anih čuk pơkra jơlan ter hang ia rơsĭ, pơdŭ gơnam nao pơ anih dŏ phrâo. Mah sang phrâo aka ƀu giong lơi, lu sang anŏ ăt hlong pơdŭ nao, jao glăi lŏn kiăng pơkra jơlan tañ ƀiă. Ơi Phạm Chí Bảo, ƀơi să Tuy An Đông brơi thâo, sang anŏ ñu tŭ ư jao lŏn, čang rơmang jơlan anai tañ giong, nao rai mơak, laih anun đĭ kyar plơi pla dong: “Kâo kiăng tañ jao glăi ala lŏn kơ kơnuk kơna mơn, kiăng pơkra jơlan tañ giong, gơmơi nao rai mơak hloh mơn, tui anun đôč yơh”.

Kiăng pơhlom bruă jao glăi lŏn pioh pơkra jơlan glông rơbêh 22km glăk hơmâo man pơkra, hơdôm boh plơi glăk pơtrut tơlơi nao hlâo mơ̆ng ƀing khua, mơnuih ping gah. Sang anŏ ơi Nguyễn Văn Hiếu, mơnuih ngă bruă amăng să Tuy An Đông, jing sa amăng hơdôm boh sang anŏ pơdŭ đuăi gơnam nao hlâo, mah bruă jŭ yap gơnam aka ƀu giong: “Sang anŏ gơmơi glăk jŭ yap gơnam đôč, samơ̆ ăt pơsur ană bơnai kiăo tui tơlơi pơtrun, jao glăi lŏn kơ kơnuk kơna tañ ƀiă, kiăng arăng man pơkra jơlan tui hăng tơlơi pơtrun mơ̆ng Ping gah tơring čar wơ̆t hăng Jơnum min mơnuih ƀôn sang tơring čar”.

Ră anai lu ring bruă tuh pơ alin ƀơi Dak Lăk glăk kaih hĭ yua aka ƀu jao glăi lŏn či man pơdong. Kơnong jơlan ter hang ia rơsĭ hơmâo năng ai 1.500 boh sang anŏ bơdjơ̆ nao lŏn tơnah, sang dŏ. Yua hnun, bruă ngă “30 hrơi mlăm” pơsit jing bruă akŏ phun mơ̆ng hơdôm boh să, phương anih hơmâo jơlan găn nao. Hrŏm hăng iâu pơthưr, pơtô pơblang, hơdôm boh tơring ăt hơmâo hơdră djru, apah bơni hăng hơdôm boh sang jao lŏn tơnah tañ. Ơi Trần Văn Biên, Khua jơnum min mơnuih ƀôn sang să Tuy An Đông brơi thâo: “Pôr pơthâo, iâu pơthưr kiăng abih bang mơnuih ƀôn sang tŭ ư, laih dong lăi pơthâo hơdră djru, apah bơni tui hăng tơlơi pơkă 26 mơ̆ng Jơnum min mơnuih ƀôn sang tơring čar, amăng anun hơmâo bruă djru kơ hơdôm boh sang anŏ ngă tui tañ, anun lĕ mơ̆ng 8 klăk truh 15 klăk prăk”.

Tơring čar Dak Lăk kiăng ngă giong bruă pơhrui ala lŏn pioh pơkra jơlan ter hang ia rơsĭ hlâo kơ kơnôl 31/8/2026. Kơnong črăn jơlan giăn 1km gah Ngŏ tơdrông An Hải găn nao să Tuy An Đông hơmâo ngă giong hlâo kơ kơnôl 30/6 pơ anăp.

Kiăng pơhlom brơi bruă čuk pơkra, man pơdong tañ, anom bruă man pơkra amra ngă bruă mơ̆ng ƀrư̆, hơmâo lŏn hơdơ̆ pă, pơkra tui dơ̆ anun. Ơi Nguyễn Khoa Anh, pơ ala Khul wai lăng hơdôm kơčăo bruă man pơdong kual gah Ngŏ Dak Lăk brơi thâo: “Să jao glăi lŏn tơnah hơdơ̆ pă, Khul wai lăng gơmơi amra pơđar pô gơgrong man pơkra brơi mơnuih nao ngă hlao mơtăm, kiăng kơ tañ giong”.

Hăng tơlơi gir run mơ̆ng gong gai, ăt kah hăng tơlơi tŭ ư mơ̆ng mơnuih ƀôn sang, bruă anai ngă pơplih rơđah biă ƀơi hơdôm boh tơring ter hang ia rơsĭ. Hơdôm mét lŏn hơmâo brơi nao hrơi anai amra djru man pơkra jơlan ter hang ia rơsĭ hiam hloh, phrâo hloh, pok rai anih đĭ kyar phrâo kơ tơlơi bơwih ƀong ia rơsĭ Dăk Lăk pơ anăp anai./.