Phrâo anai, tơring čar Dak Lak pơphun Jơnum pơlir tour hăng pơđĭ kyar anih tuai čuă ngui kiăng ĕp lăng tơlơi dưi, tơlơi gal hăng tơlơi sit nik mơng gơnong bruă tuai čuă ngui ƀơi ƀon lan, laih dong pơphun jơnum pơƀut kiăng ƀing kơhnâo kơhnăk, mơnuih wai lăng hăng ƀing bơwih ƀong sĭ mơdrô  dưi pơlăi nao rai, ba tơbiă hơdôm hơdră pơđĭ kyar tuai čuă ngui hơđong kjăp, hrưn đĭ pran bơkơtưn, pơgôp ngă tui hơnong pơkă pơđĭ kyar bơwih ƀong huă dua mrô rơwang thun 2026-2030.

Amăng mông jơnum, lu mơnuih kơhnâo kơhnăk hăng ƀing bơwih ƀong sĭ mơdrô pơsit tong bruă pơmut hrŏm anih anom pơđĭ kyar kơplah wah kual Dap kơdư hăng hang ia rơsĭ pok rai tơlơi dưi prong brơi gơnong bruă tuai čuă ngui ƀơi Dak Lak. Mơng sa anih hmư̆ hing mơng kơphê, gru grua čing hơgor, plơi pla, dơnao ia Lăk, Ƀuôn Đôn hăng kual glai rưng, Dak Lak ră anai hơmâo pơhrua dong hơdôm tơlơi dưi mơng kual ia rơsĭ, kual tong wing, hang pơtâo hrŏm hăng hơdôm gru grua yôm hăng gơnam ƀong jơman mơng ia rơsĭ.

Bruă pơlir hơbit kơplah wai kual ia rơsĭ hăng čư̆ siăng arăng lăng kar hăng tơlơi yak nao hăng lu tơlơi dưi kiăng pơjing gơnam tuai čuă ngui pơlir kual phara, bong glăi tuai sui ƀiă hăng hơmâo lu dong anih ĕp lăng brơi kơ tuai. Samơ̆, tui ƀing kơhnâo kơhnăk, tơlơi dưi anai amra ba glăi tŭ yua sit nik lơm dưi pơjing rai gơnam tuai čuă ngui yôm, bơkơtưn kơtang. Ơi Nguyễn Hữu Y Yên, Khua khul ding kơna kông ti TNHH sa ding kơna bơwih brơi tuai čuă ngui Saigontourist brơi thâo:

“Tơdơi hơmâo jơlan rơdêh đuăi hmar tơkuh nao rai ƀôn prong Hồ Chí Minh hăng Tuy Hòa, đuăi nao rai dŏ 7 mông. Ngă hiưm pă kiăng Tuy Hòa hơmâo hơdôm jơlan hơdră klă hloh, pơhưč lu mơnuih. Rơngiao kơ bruă mơnơi ter hang ia rơsĭ tui ră anai, ƀing gơmơi kiăng tuh pơ alin pơhrui dong hơdôm anih ngui ngor pơprong, ngă tui anun kah hơmâo lu tuai glăi ngui pơ Tuy Hòa”.

Hrŏm hăng hơdôm tơlơi dưi phrâo, ƀing khua mua ăt črâo nao tong ten hơdôm tơlơi gun glăk ngă pơgăn bruă pơđĭ kyar mơng gơnong bruă tuai čuă ngui anun lĕ jơlan glông aka ƀu pơkra ha amăng plĕ, bruă bơwih bơwang aka ƀu pơhlôm klă tui tơlơi dưi, bruă pơsur lăi pơthâo ăt aka ƀu klă hăng bruă mă yua boh thâo phrâo aka lăp djơ̆ tơlơi rơkâo pơđĭ kyar amăng rơnuk phrâo. Lu tơlơi pơgôp hiăp rơkâo tơring čar kiăng hơmâo tơhnal pơkă phara kiăng pơhưč tuh pơ alin man pơkra anih anom tuai čuă ngui, djru brơi anom bơwih ƀong sĭ mơdrô pơjing gơnam tam phrâo hăng pok lu tour čuă ngui pơlăi nao rai.

Amăng hrơi blan pơđĭ kyar tuai čuă ngui mơtah, rơgơi hăng hơđong kjăp, Dak Lak čang rơmang amra mă yua klă hơdôm anih pơđĭ kyar phrâo kiăng pơjing rai lu gơnam yôm phara, pơgôp hrưn đĭ kơdrưh ang kơ anih tui nao amăng hră lơkak tuai čuă ngui dêh čar. Tŭ mă tơlơi pơgôp hiăp amăng mông jơnum, ơi Đào Mỹ, kơ-iăng Khua Jơnum min mơnuih ƀon sang tơring čar Dak Lak brơi thâo, ƀon lan amra đing nao pok pơhai hơdôm hơdră akŏ phun djru brơi anom bơwih ƀong sĭ mơdrô hăng pơđĭ kyar anih čuă ngui.

“Pơjing hră lơkak črâo brơi anih čuă ngui lĕ blung a. Dua dong lĕ hơmâo hơdră djru brơi pok tour, kiăng pơjing anih čuă ngui. Ngă tui anun kah anom bơwih ƀong hơđong pran jua nao pok Tour, pơjing anih čuă ngui kiăng pơhưč lu mơnuih nao nguii”.

Ƀu djơ̆ kơnong dŏ glăi ƀơi hơdôm jơlan gah yôm phăn, jơnum ăt tŭ yap hơdôm tơlơi yak nao tong ten kiăng pơtrut pơlir pơđĭ kyar tuai čuă ngui. Gơnong bruă gru grua, bơrơguăt drơi jăn hăng tuai čuă ngui tơring čar Dak Lak hơmâo kĭ jơlan hơdră ngă hrŏm hăng sa, dua anom bruă ba hyu tuai čuă ngui, laih dong hơdôm anom bruă bơwih brơi tuai čuă ngui, sang jưh tuai, hơdôm anih čuă ngui, sang ƀong huă hăng anom bruă pơgiăng hyu tuai ăt kĭ hră pơkôl pơlir nao rai, pok pơhai hơdră djru kơ nua hăng hrưn đĭ klă bruă bơwih bơwang kiăng pơsur tuai čuă ngui.

Jơlan gah pơlir kual ăt glăk hơmâo lu ƀon lan pơtrut kơtang. Phrâo anai, Lâm Đồng hăng Khánh Hòa ăt hơmâo pơphun jơlan hơdră pơlir pơsur tuh pơ alin, sĭ mơdrô hăng tuai čuă ngui thun 2026, pok prong tơlơi dưi ngă hrŏm kơplah wah kual Dap kơdư hăng ter hang ia rơsĭ Dơnung tong krah. Dua boh tơring čar hơmâo kĭ 8 pok hră pơ-ar ngă hrŏm kơplah wah hơdôm anom bơwih ƀong kiăng pơtrut pơsur tuh pơ alin, sĭ mơdrô hăng bơwih bơwang. Lơm Khánh Hòa lĕ anih phun bơwih ƀong kual ia rơsĭ hăng anih anom bơwih brơi tuai čuă ngui pơđĭ kyar, Lâm Đồng hơmâo tơlơi gal kơ ayuh hyiăng, đang glai, anih pơdơi pran hăng ngă hmua yua boh thâo phrâo. Bruă tơkuh nao rai hơdôm ară jơlan phun anun lĕ jơlan mrô 1, jơlan rơdêh đuăi hmar kơdư-Dơnung, jơlan mrô 27C, jơlan rơdêh treng Kơdư-Dơnung hrŏm hăng tơdrun kompăn hăng tơdron rơdêh por ba glăi tơlơi dưi kiăng pơjing hơdôm gơnam tuai čuă ngui, pok prong anih pơđĭ kyar hăng pơhưč tuh pơ alin.

Mơng kual Dap kơdư truh pơ ia rơsĭ, bruă pơlir kơplah wah hơdôm boh ƀon lan kual Dap kơdư hăng Dơnung tong krah glăk pok rai anih pơđĭ kyar phrâo brơi tuai čuă ngui. Lơm hơdôm tơlơi dưi phara dưi pơlir jing pran kơtang hrŏm, anai amra lĕ tơlơi pơtrut yôm phăn kiăng kual pơtrut tañ, pơgôp amăng bruă hrưn đĭ mơng pô kơ lŏn ia ta amăng rơnuk pơplih phrâo./.