Ƀơi Dak Lăk, tơdơi kơ sa blan ngă bruă “30 hrơi mlăm” pơmut boh thâo mrô djŏp hră pơ-ar, tơlơi pơhing gru mrô anih pla hăng anih anung gơnam amăng hruh, truh ră anai năng ai 60% đơ đam hmua hăng hră pơ-ar hơmâo dưm amăng mrô. Bruă anai hơmâo ngă mơ̆ng kơnôl 7/8 truh kơnôl 7/9, pơƀut lăng glăi, čih pioh, pơsit tong ten hăng ba pơmut djŏp tơlơi pơhing hơmâo mơ̆ng kual pla sâu riêng hăng anih anung boh sâu riêng. Hơdôm grup mă bruă nao lăng tơl anih pla, pô wai lăng, hră pơ-ar hơmâo kĭ kơđŏm, hăng bruă pơkra gơnam. Anai ƀu kơnong dưm pơmut hră pơ-ar đôč ôh, ăt jing bruă pơsit tong ten tơlơi pơhing kiăng pơđĭ tui boh tŭ yua bruă wai lăng, bơwih brơi bruă ĕp ƀuh anih pla, hăng kiăo tui tơlơi kiăng mơ̆ng anih ƀing ta ba sĭ gơnam. Ơi Bùi Hồng Qúy, Khua gơnong bruă ngă hmua hăng ayuh hyiăng tơring čar Dak Lăk brơi thâo: “Gơnong bruă ngă hmua hăng ayuh hyiăng hơmâo akŏ pơdong 8 grup ngă bruă anai laih anun ăt rơkâo hơdôm boh să, phương hơmâo sâu riêng hyu pôr pơthâo, iâu pơthưr neh met wa gum ngă hră gru mrô anih pla, ngă hrŏm dưm pơmut mrô anih pla. Gơnong bruă ăt krăo lăng gum hrŏm hăng hơdôm boh tơring đah mơ̆ng ngă hơdôm bruă dŏ glăi”.

Ngă tui Hră pơtrun mrô 36/2026/NQ-CP, Anom bruă pơtrut pơsur ngă hmua dêh čar, Ding jum ngă hmua hăng ayuh hyiăng pơtŏp rơguăt bruă kơ khul pơtrut pơsur ngă hmua pơkra gơnam rơnuk rơnua, hơdjă, dưm pơmut mrô anih pla, ĕp ƀuh anih pơkra gơnam hăng kiăo tui anŏ kiăng mơ̆ng anih sĭ mơdrô ƀơi Lâm Đồng. ƀing tui hrăm sem lăng bruă pla boh kruăi hrĕ prong năng ai 8.000m2, ƀơi să Phú Sơn Lâm Hà, hơmâo ngă tui VietGAP, mă yua măi pruih ia tơdjoh rô ƀơƀrĕ, hăng pruai hơbâo mă hơjăn. Khul ăt sem lăng sa boh sang măi pơkra boh kruăi hrĕ, dưi pơkra năng ai rơbêh 10.000 tơn rim thun. Ơi Lê Quốc Thanh, Khua anom bruă pơtrut pơsur ngă hmua dêh čar pơsit: lơ̆m anih pla hơmâo pơkă tong ten, gơnam hơmâo hră pơ-ar, bruă pơkra gơnam nao hrŏm hăng anih mơdrô, bruă pơhno mơ̆ng gơnam Việt Nam amra kơtang hloh: “Pơtrut pơsur ngă hmua khŏm gum hrŏm hăng neh met wa pơ đang hmua mơtăm. Khŏm pơplih hăng pơplih tơlơi pơmin jao glăi boh thâo kĭ thuâ̆t jing tơlơi pơmin bơwih ƀong mơ̆ng hmua, gum ngă djŏp mơta bruă. Ƀing ta khŏm hơmâo djŏp tơlơi rơgơi, rơguăt bruă, amra hơmâo hơdôm akŏ bruă, anih pơtŏp hrăm kiăng jing mơnuih pơtrut pơsur ngă hmua rơgơi. Thâo djŏp tơlơi hơmâo ƀơi anih sĭ mơdrô, thâo pơtruh hăng djru ba mơnuih ngă hmua mut hrŏm sang bruă ngă ƀong hrŏm”.

Phrâo anai, Anom bruă tơjŭ pla hăng pơgang phun pla, Ding jum ngă hmua hăng ayuh hyiăng brơi thâo, Anom bruă rô nao rai sĭ mơdrô dêh čar Khač pơsit brơi thim 567 mrô anih anung gơnam hăng anih pla sâu riêng dưi ba sĭ pơ čar Khač. Amăng anun hơmâo 401 mrô anih pla hăng 166 mrô pơkă anih anung gơnam. Mơ̆ng anun, djru bruă ba sĭ sâu riêng sit nik pơ čar Khač, laih dong ngă gêh găl kiăng hơdôm boh tơring, sang bruă mơdrô hăng mơnuih ƀôn sang pơphun glăi bruă ngă hmua, blơi gơnam, anung amăng hruh, hăng ba sĭ, biă ñu amăng hrơi mông Dap Kơdư glăk amăng bơyan pĕ pơhrui boh.

Mơ̆ng mrô hơmâo dưm pơmut ƀơi Dak Lăk, hơdôm hơbô̆ bruă pơkra gơnam sit nik ƀơi Lâm Đồng truh kơ bruă pok prong mrô anih pla dưi ba sĭ pơ čar Khač, brơi ƀuh bruă ngă hmua Việt Nam pơplih mơ̆ng phun mơtăm yơh. Anun lĕ pơplih tơlơi pơmin ngă bruă, hơdră wai lăng truh kơ bruă ĕp anih sĭ mơdrô; mơ̆ng pơkra gơnam ngă mă hơjăn hơdai ngă hrŏm, mơ̆ng kiăng kơ hơmâo lu hơdai lăng yom anŏ klă, jơman, anŏ yom. Anai ăt jing sa amăng hơdôm tơlơi pơƀuh rơđah bruă Việt Nam hrưn đĭ amăng rơnuk phrâo; mă yua boh thâo, pơđĭ tui mơnuih mă bruă rơgơi, pơphun glăi bruă pơkra gơnam hăng dưi ngă klă tui hăng hơnong pơkă mơ̆ng anih mơdrô jar kmar./.