Mơguah hrơi anai lơ 17/3, ƀơi Hà Nội, pơphun Jơnum čih tơlơi pơhing đơ đam dêh čar thun 2023. Jơnum čih tơlơi pơhing pơphun amăng 3 hrơi dong mơng lơ 17/3 truh lơ 19/3 hăng anăn “Gum pơgôp-Kjăp bruă-Gru grua-Thâo pơčeh”. Jơnum čih tơlơi pơhing đơ đam dêh čar thun anai hăng 87 anih pơdă prưng mơng 63 Khul mơnuih čih tơlơi pơhing hơdôm tơring čar, ƀôn prong, 60 boh anom mă tơlơi pơhing gơnong glông hăng ƀon lan, hrŏm hăng hơdôm anih pơdă prưng gơnam ba gru mơng hơdôm Khul pơlir hơbit: Hră pơhing mơnuih ƀon sang, Gong phun jua pơhiăp dêh čar Việt Nam, Gong pơdah rup Việt Nam, Anom mă tơlơi pơhing Việt Nam, Ding jum pôr pơhing … hăng hơdôm bruă mă mơng khul hơdôm anih anom pơtô pơhrăm ƀing čih tơlơi pơhing, anih pơdă prưng mơng hơdôm anom bruă hơmâo dưm dăp gơnam măi mao mă tơlơi pơhing.

Tơlơi pơđŏm glăi amăng Jơnum čih tơlơi pơhing thun anai lĕ hơdôm mông jơnum pơƀut kơ bruă mă tơlơi pơhing hơmâo Jơnum pơbưp ƀing mă pri A Tal pơplông čih tơlơi pơhing dêh čar hơmâo pơdah lăng nao rai mơng Gong phun jua pơhiăp dêh čar Việt Nam: Jơnum A.I hăng wai lăng tơlơi pơčeh boh tơhnal amăng bruă čih tơlơi pơhing; Jơnum pơtô pơhrăm bruă čih tơlơi pơhing tui tơlơi rơkâo….Mơng anun ƀing mơnuih čih tơlơi pơhing đơ đam dêh čar hăng abih bang mơnuih dưi sem lăng hăng pơhrăm nao rai hluai tui hơdôm tơlơi čih djơ̆ hloh, pơgôp  hrưn đĭ klă dong amăng bruă mă tơlơi pơhing.