Him lăng pơphun amăng 2 tal jơnum: tal sa: pơphun 1 hrơi (tlam anai hăng mơguah pơgi kơnôl 4/9/2026); tal 2: 4,5 hrơi (dong mơng kơnôl 21/9 truh mơguah kơnôl 25/9/2026). Amăng jơnum lok 6, Jơnum min apăn bruă Khua pơ ala mơnuih ƀon sang dêh čar amra sem lăng, pơgôp hiăp amăng 27 črăn tơlơi phiăn, tơlơi pơtrun, sit biă ñu  črăn tơlơi phiăn čih pơkra glăi, pơhrua sa, dua tơlơi amăng tơlơi phiăn Chứng khoán; tơlơi phiăn pơplih pơkra, pơhrua sa, dua tơlơi amăng tơlơi phiăn Kế toán, tơlơi phiăn jŭ yap prăk kak phara…

Ăt amăng mông jơnum, jơnum min apăn bruă Khua pơ ala mơnuih ƀon sang dêh čar amra sem lăng, tŭ yap hơdôm črăn tơlơi pơtrun yôm phăn anun lĕ: tơlơi pơtrun kơ Jơlan hơdră čih pơkra tơlơi phiăn thun 2027; tơlơi pơtrun pơkă kơ bruă hơdôm anom bruă pel ĕp dưi tŭ mă ha amăng mrô prăk kak pơhrui glăi, ĕp ƀuh hluai tui bruă pel ĕp tơdơi kơ nô̆p amăng ngăn drăp kơnuk kơna kiăng mă yua amăng bruă mă hăng hrưn đĭ klă bruă mă mơng anom bruă pel ĕp; tơlơi pơtrun kơ tơhnal pơkă wai pơgang mơnuih phat kơđi. Jơnum min apăn bruă Khua pơ ala mơnuih ƀon sang dêh čar amra pơgôp hiăp amăng Jơlan hơdră hơnong pơkă dêh čar amăng pơgang, pơgăn bruă ngă soh rơwang thun 2026-2030, anăp nao truh thun 2035.