Tui hăng tơlơi lăi pơthâo glăi, hrơi blan rơgao anom tơhan pôlih hơmâo gir run wai lăng klă, pơđĭ tui boh tŭ yua bruă krư̆ mơnă, ngă tui djơ̆ bruă phak dŏ sang krư̆; pơhlôm rơnuk rơnua, hơđong ƀơi 54 boh sang krư̆ hăng 178 boh sang krư̆ pơčlah phara. Hrŏm hăng anun, tơhan pôlih ăt ngă klă amăng pơphô bruă, ngă tui bruă pơklaih mơnă hlâo thun blan pơkôl djơ̆ tơlơi pơkă. Amăng 2 thun rơgao hăng rơbêh 32.000 čô mơnuih arăng brơi tơbiă hlâo thun pơkă samơ̆ mơnuih pơwot glăi ngă soh aset biă mă (0,06%), pơdah tơlơi djru khăp pap tui hơdră djru mơnuih mơnam, laih dong pơdah tong ten boh than ba glăi amăng pơplih, pơtô pơjuăt brơi ƀing ngă soh. Pơpŭ hơdôm boh than dưi ngă prong mơ̆ tơhan pôlih, tơhan wai lăng sang mơnă dưi ngă amăng thun blan rơgao; samơ̆ Khua git gai Ping gah, Khua mir sir ơi Tô Lâm ăt brơi thâo, ƀing ta ăt kiăng lăng nao tơpă kơ bruă wai lăng, bruă krư̆ mơnă, brơi pơwot glăi pơ plơi pla ăt aka ƀu kiăo tui djơ̆ hăng tơlơi sit nik.

Khua git gai Ping gah, Khua mir sir ơi Tô Lâm rơkâo, đing nao ngă tui 6 jơlan gah pơprong, amăng anun, kiăng pơplih amăng tơlơi pơmĭn kơ bruă phak kơđi hình sự hăng bruă wai lăng amăng pơtô pơjuăt, pơplih kơtang mơng tơlơi pơmĭn wai lăng ƀing mơnă hơdai nao pơtô pơjuăt brơi. Ñu ăt rơkâo, pơlir kjăp bruă phak tui kơđi hình sự hăng bruă pơgang, ĕp ƀuh, kơdong glăi ƀing ngă soh hăng pơjing bruă pơhlôm hơđong mơnuih mơnam mơng atur phun.